ఆ సమయంలో టీ20లకు రిటైర్మెంట్ ఎందుకు ప్రకటించానో వెల్లడించిన విరాట్ కోహ్లీ

భారత క్రికెట్ జట్టు 2024 టీ20 ప్రపంచ కప్ గెలిచిన అనంతరం అంతర్జాతీయ టీ20 ఫార్మాట్‌కు రిటైర్మెంట్ ప్రకటించిన స్టార్ బ్యాటర్ విరాట్ కోహ్లీ, తాజాగా తన నిర్ణయం వెనుక గల కారణాన్ని వెల్లడించాడు. పూర్తిగా కొత్త తరం ఆటగాళ్లను దృష్టిలో ఉంచుకుని ఈ నిర్ణయం తీసుకున్నట్లు స్పష్టం చేశాడు. జట్టులోకి వచ్చేందుకు యువ క్రీడాకారులు సిద్ధంగా ఉన్నారని, రాబోయే ప్రపంచ కప్‌కు సన్నద్ధమవడానికి వారికి తగిన సమయం, అనుభవం అవసరమని అన్నాడు.

"కొత్త ఆటగాళ్లు జట్టులోకి వచ్చి, ప్రపంచంలోని వివిధ ప్రాంతాల్లో ఆడి, ఒత్తిడిని ఎలా ఎదుర్కోవాలో నేర్చుకోవాలి. ప్రపంచ కప్ నాటికి వారు పూర్తిగా సిద్ధంగా ఉన్నామనే భావన కలగాలంటే, వారికి కనీసం రెండేళ్ల సమయం పడుతుంది. అందుకే టీ20 ప్రపంచ కప్ ఫైనల్ ముగిసిన వెంటనే వీడ్కోలు నిర్ణయం తీసుకున్నాను" అని వివరించాడు. ఫైనల్‌లో మ్యాచ్ విన్నింగ్ ఇన్నింగ్స్ ఆడిన కోహ్లీ, తన టీ20 కెరీర్‌లో 125 మ్యాచ్‌ల్లో 4,188 పరుగులు సాధించాడు.