హాట్ ఎయిర్ బెలూన్ పైనుంచి పడి వ్యక్తి మృతి.. వీడియో ఇదిగో!

రాజస్థాన్ లోని బారన్ జిల్లాలో విషాదం చోటుచేసుకుంది. హాట్ ఎయిర్ బెలూన్ ను పరీక్షిస్తుండగా ప్రమాదం జరిగింది. ఉన్నట్టుండి బెలూన్ గాలిలోకి లేవడంతో దానికి కట్టి ఉన్న తాడుకు చిక్కుకుని ఓ వ్యక్తి కూడా పైకెగిరాడు. దాదాపు వంద ఫీట్ల ఎత్తుకు చేరుకున్నాక తాడు తెగడంతో కిందపడి మరణించాడు. దీనికి సంబంధించిన వీడియో ప్రస్తుతం సోషల్ మీడియాలో వైరల్ గా మారింది. బారన్ జిల్లా ఫౌండేషన్ డే వేడుకలకు ఏర్పాట్లు చేస్తుండగా ఈ దుర్ఘటన చోటుచేసుకుంది.

దీంతో మూడు రోజుల పాటు నిర్వహించ తలపెట్టిన వేడుకలను జిల్లా యంత్రాంగం రద్దు చేసింది. హాట్ బెలూన్ గాలిలోకి ఎగరడం, తాడుకు చిక్కుకుని ఓ వ్యక్తి దానికి వేలాడడం, పైకెగిరాక తాడు తెగడంతో ఆ వ్యక్తి కింద పడడం వీడియోలో స్పష్టంగా కనిపిస్తోంది. కాగా, ప్రమాదం జరిగిన వెంటనే బాధితుడిని ఆసుపత్రికి తరలించగా.. వైద్యులు పరీక్షించి అప్పటికే మరణించాడని చెప్పారు. ఈ ప్రమాదంలో చనిపోయిన వ్యక్తిని కోటాకు చెందిన వాసుదేవ్ ఖాత్రిగా గుర్తించినట్లు అధికారులు తెలిపారు. ప్రమాదంపై కేసు నమోదు చేసుకుని దర్యాప్తు చేపట్టినట్లు పోలీసులు వివరించారు.