నిద్రపోయి ఔటైన పాకిస్థాన్ బ్యాటర్ షకీల్.. పాక్ క్రికెట్ చరిత్రలో తొలి ఆటగాడిగా చెత్త రికార్డు
- దేశవాళీ టోర్నీలో ఘటన
- రంజాన్ సందర్భంగా రాత్రి 7.30 నుంచి తెల్లవారుజామున 2.30 గంటల వరకు మ్యాచ్
- ప్రపంచ క్రికెట్ చరిత్రలో ఇలా ఔటైన ఏడో బ్యాటర్గా షకీల్ పేరిట అవాంఛిత రికార్డు
మంగళవారం పీటీవీతో జరిగిన మ్యాచ్లో షకీల్ స్టేట్ బ్యాంకు తరపున బరిలోకి దిగాడు. రంజాన్ మాసం కావడంతో రాత్రి 7.30 గంటల నుంచి తెల్లవారుజామున 2.30 గంటల వరకు మ్యాచ్ నిర్వహించారు. పేసర్ మహ్మద్ షాజాద్ రెండు వరుస బంతుల్లో ఉమర్ అమీన్, ఫవాద్ ఆలంను పెవిలియన్ పంపాడు.
ఈ క్రమంలో మూడు నిమిషాల్లోపు మరో బ్యాటర్ క్రీజులోకి రావాల్సి ఉండగా షకీల్ ఆ వ్యవధి దాటిన తర్వాత క్రీజులోకి వచ్చి గార్డ్ తీసుకున్నాడు. అయితే, పీటీవీ కెప్టెన్ అమ్మాద్ బట్ అప్పీల్ చేయడంతో షకీల్ను అంపైర్లు ఔట్గా ప్రకటించారు. ప్రపంచ క్రికెట్ చరిత్రలో ఇలా టైమ్డ్ ఔట్ అయిన ఏడో బ్యాటర్గా, పాక్ చరిత్రలో ఇలా ఔటైన తొలి ఆటగాడిగా షకీల్ ఓ చెత్త రికార్డును మూటగట్టుకున్నాడు.
