బయోడైవర్సిటీ ఫ్లైఓవర్ పైనుంచి కిందపడ్డ బైకర్.. స్పాట్ లోనే దుర్మరణం

హైదరాబాద్ లోని బయోడైవర్సిటీ ఫ్లైఓవర్ పై ఆదివారం రాత్రి ఘోర ప్రమాదం జరిగింది. గుర్తుతెలియని వాహనం ఢీ కొట్టడంతో ఓ బైకర్ ఎగిరి ఫ్లైఓవర్ కింద పడ్డాడు. తీవ్రగాయాలు, రక్తస్రావంతో అక్కడికక్కడే చనిపోయాడు. ఈ ప్రమాదంలో చనిపోయిన వ్యక్తిని రాయదుర్గంకు చెందిన సుబ్బారావు (38) గా గుర్తించినట్లు పోలీసులు తెలిపారు. బైక్ పై టిఫిన్లు అమ్ముకుంటూ సుబ్బారావు జీవనం సాగించేవాడని పేర్కొన్నారు. ఈ క్రమంలో ఆదివారం రాత్రి బయోడైవర్సిటీ ఫ్లైఓవర్ పైనుంచి వెళుతుండగా.. వెనక నుంచి వేగంగా వచ్చిన గుర్తుతెలియని వాహనం ఢీకొట్టింది. దీంతో సుబ్బారావు ఫ్లైఓవర్ కిందపడ్డాడని చెప్పారు. పోలీసులు కేసు నమోదు చేసుకుని విచారణ చేపట్టారు.