Instagram: తల్లీకొడుకుల అసభ్య వీడియో.. ఇన్‌స్టాగ్రామ్‌పై పోక్సో చట్టం కింద కేసు నమోదు
- ఇటీవల వైరల్ అయిన వీడియో
- తీవ్రంగా పరిగణించిన జాతీయ బాలల హక్కుల సంరక్షణ కమిషన్
- పశ్చిమ బెంగాల్‌లోని దీనాజ్‌పూర్‌లో అప్‌లోడ్ అయిన వీడియో
- అమెరికాలోని మెటా కార్యాలయానికి నోటీసులు
తల్లీ, కుమారుడి అసభ్యమైన కంటెంట్‌కు సంబంధించి సోషల్ మీడియా ప్లాట్‌ఫాం ఇన్‌స్టాగ్రామ్‌పై పోక్సో, ఐటీ చట్టం కింద కేసు నమోదైంది. జాతీయ బాలల హక్కుల సంరక్షణ కమిషన్ (ఎన్సీపీసీఆర్) ఆదేశాల మేరకు పోలీసులు ఈ కేసు నమోదు చేశారు. అనంతరం అమెరికాలోని మెటా కార్యాలయానికి ఈ మేరకు నోటీసులు పంపారు.
తల్లీకుమారుడు ముద్దులు పెట్టుకుంటూ అసభ్యంగా ప్రవర్తించిన ఈ వీడియో సోషల్ మీడియాలో వైరల్ కావడంతో స్పందించిన ఎన్సీపీసీఆర్ పోలీసులకు ఫిర్యాదు చేసింది. ఇది పశ్చిమ బెంగాల్‌లోని దక్షిణ దీనాజ్‌పూర్‌ నుంచి అప్‌లోడ్ అయినట్టు గుర్తించారు.
ఇటువంటి వీడియోలను ప్రమోట్ చేస్తున్నందుకు తమ ముందు వ్యక్తిగతంతా హాజరు కావాలంటూ ఈ ఏడాది జనవరిలో యూట్యూబ్ ఇండియా అధికారులను ఎన్సీపీసీఆర్ ఆదేశించింది. ఆ తర్వాత మహారాష్ట్రలోనూ యూట్యూబ్‌పై కేసు నమోదైంది. ‘తల్లీకొడుకు చాలెంజ్’ వీడియోలు పోస్టు చేసినందుకు యూట్యూబ్‌పైనా పోక్సో కింద అభియోగాలు నమోదయ్యాయి.
