Rithika Singh: నేరుగా ఒటీటీకి వస్తున్న భయపెట్టే 'వళరి'

దెయ్యం అనే నేపథ్యం ప్రేక్షకులను ఎప్పుడూ భయపెట్టే అంశమే. దెయ్యాలు ఉన్నాయా .. లేవా అనే విషయం అటుంచితే, భయపడుతూనే ఈ తరహా సినిమాలు చూసేవారి సంఖ్య ఎక్కువగానే ఉంటుంది. అలాంటి హారర్ నేపథ్యంలో వచ్చే సినిమాలకు ఓటీటీ ఫ్లాట్ ఫామ్ పై విపరీతమైన ఆదరణ లభిస్తోంది.

అలాంటి ఒక సినిమా ఇప్పుడు ఈటీవీ విన్ నుంచి రావడానికి రెడీ అవుతోంది .. ఆ సినిమానే 'వళరి'. రితికా సింగ్ ప్రధానమైన పాత్రను పోషించిన ఈ సినిమాలో, ఆమె జోడీగా శ్రీరామ్ కనిపించనున్నాడు. మ్రితిక సంతోషిణి దర్శకురాలిగా పరిచయమవుతున్న ఈ సినిమా, థియేటర్స్ లో కాకుండా నేరుగా ఓటీటీ తెరపైకి వచ్చేస్తోంది. 

మార్చి 6వ తేదీ నుంచి ఈ సినిమా ఈటీవీ విన్ లో లో స్ట్రీమింగ్ కానుంది. రీసెంట్ గా వదిలిన టీజర్ ఈ సినిమాపై మరింత ఆసక్తిని పెంచుతోంది. ఆంగ్లేయుల పరిపాలనా కాలానికి ముందు తమిళ ప్రాంతంలో 'వళరి' అనే ఒక ఆయుధాన్ని ఉపయోగించేవారు. ఎంతో ఆయుధ సామాగ్రి ఉన్న ఆంగ్లేయులను భయపెట్టిన ఆయుధం ఇది. అలాంటి ఆయుధానికీ .. దెయ్యానికి ఉన్న సంబంధమేమిటనేదే కథ.