నేను రెడ్డి వ్యతిరేకిని కాను: వైసీపీ నేత అనిల్ కుమార్ యాదవ్

రెడ్డి సామాజికవర్గం తనకు వ్యతిరేకమంటూ దుష్ప్రచారం చేస్తున్నారని మాజీ మంత్రి, నెల్లూరు సిటీ ఎమ్మెల్యే అనిల్ కుమార్ యాదవ్ ఆవేదన వ్యక్తం చేశారు. తాను రెడ్డి వ్యతిరేకిని కాదని ఆయన చెప్పారు. తాను పని చేస్తున్న నాయకుడు (జగన్) ఆ సామాజికవర్గానికి చెందిన వ్యక్తే కదా అని అన్నారు. రెడ్డి సామాజికవర్గానికి చెందిన వారే జగన్ ను మోసం చేశారేమో కానీ... తాను మాత్రం మోసం చేయలేదని చెప్పారు. మనిషి అన్నాక ఇద్దరుముగ్గురితో విభేదాలు రాకుండా ఎలా ఉంటాయని ప్రశ్నించారు. 

ముక్కుసూటిగా వ్యవహరించడం తన నైజమని... అందుకే తనపై బురద చల్లుతున్నారని చెప్పారు. తాను చెన్నై, హైదరాబాద్ వెళ్లినప్పుడల్లా రెడ్లు మీకు వ్యతిరేకమా? అని పలువురు అడుగుతున్నారని అనిల్ అన్నారు. నెల్లూరులో అందరితో కలిసికట్టుగా ఉండటం వల్లే రెండు సార్లు ఎమ్మెల్యేగా గెలుపొందానని చెప్పారు. తాను ఎవరినీ ఇబ్బంది పెట్టలేదని అన్నారు. వచ్చే ఎన్నికల్లో కూడా రెడ్డి సామాజికవర్గం ఆశీస్సులు, దీవెనలు ఉండాలని కోరుకుంటున్నానని చెప్పారు.