Chandrababu: కోడిగుడ్డు మంత్రికి సీటు ఇవ్వలేకపోయావు!: బొబ్బిలి సభలో చంద్రబాబు వ్యాఖ్యలు
- విజయనగరం జిల్లా బొబ్బలిలో రా కదలిరా సభ
- వాడీవేడిగా ప్రసంగించిన చంద్రబాబు
- సీఎం జగన్ పై నిప్పులు చెరుగుతూ ప్రసంగం
జగన్ రెడ్డి పాలనలో పెరిగిన నిత్యావసర ధరలతో పేదలు సంతోషంగా సంక్రాంతి పండుగ జరుపుకునే పరిస్ధితి కూడా లేదని టీడీపీ జాతీయ అధ్యక్షుడు నారా చంద్రబాబు నాయుడు ధ్వజమెత్తారు. విజయనగరం జిల్లా బొబ్బిలిలో నేడు నిర్వహించిన 'రా... కదలిరా' బహిరంగ సభలో చంద్రబాబు పాల్గొని ప్రసంగించారు.
‘‘నేడు జనసునామీతో బొబ్బిలి కోట బొబ్బిలి పులిలా గర్జిస్తోంది. ఈ గర్జనకు తాడేపల్లి ప్యాలెస్ పిల్లి వణికిపోతోంది. గతంలో బొబ్బిలి రాజులు ప్రజల కోసం పనిచేశారు... నేడు సైకో స్వార్ధంతో రాష్ట్రాన్ని నాశనం చేస్తున్నారు. 5 కోట్ల ప్రజల భవిష్యత్తు కోసమే రా... కదలిరా అని పిలుపునిచ్చా. రోడ్లు కూడా సరిగా లేని సమయంలో ఆర్థిక సంస్కరణలు అందిపుచ్చుకుని రాష్ట్రాన్ని అభివృద్దిచేశాం.
టెలికమ్యూనికేషన్ కు నాంది పలికాం. ఐటీ అభివృద్ధికి బాటలు వేశా. యువతకు అవకాశాలు కల్పిస్తే ప్రపంచాన్ని జయించే శక్తిగా ఎదుగుతారు. హైదరాబాద్ లో అడుగడుగునా నా అభివృద్ది కనిపిస్తుంది. నేను ఐటీ అభివృద్ది చేయటం వల్లే అనేక దేశాల్లో తెలుగు జాతి స్ధిరపడింది. నాకు కష్టం వచ్చినపుడు 80 దేశాల్లో తెలుగు వారు మద్దతు తెలిపారంటే అదీ మన సత్తా.
నేను పెత్తందారుడుని అంట... జగన్ నిరుపేద అంట. ఆయనకు సాక్షి పేపర్, సాక్షి టీవీ లేవంట... ప్యాలెస్ లు, ప్యాక్టరీలు కూడా లేవంట. కనీసం డ్రాయర్ కూడా లేని నిరుపేద జగన్. ముద్దులకు మురిసిపోయి మీరు ఓట్లు గుద్దారు. ఇప్పుడు పిడిగుద్దులు గుద్దుతున్నాడు.
ఉత్తరాంధ్ర నుంచి బీసీ నాయకుడు ఎర్రన్నాయుడిని కేంద్రమంత్రిని చేసిన ఘనత టీడీపీది. కిమిడి కళా వెంకట్రావు సహా అనేక మందికి మంత్రి పదవులిచ్చాం. ఉత్తరాంధ్రకు నీళ్లు, పరిశ్రమలు తెచ్చి మౌళిక సదుపాయాలు కల్పించి యువతకు ఉపాధి కల్పిస్తాం.
శ్రీకాకుళంలో మహేంద్ర తనయ ఆప్ సోర్స్ ప్రాజెక్టు పూర్తి చేయలేదు. తోటపల్లి ప్రాజెక్టు ద్వారా 2 లక్షల ఎకరాలకు నీరివ్వొచ్చు. గన్ రెడ్డికి ఉత్తరాంధ్రలో ఉన్న ఆస్తులపై తప్ప ప్రజలపై ప్రేమ లేదు. విశాఖలో రూ.40 వేల కోట్ల ఆస్తులు కొట్టేశారు. ఎక్కడ భూమి కనపడితే అక్కడ జగన్ కన్ను పడుతుంది. మెడపై కత్తి పెట్టి బెదిరించి ఆస్తులు రాయించుకుంటున్నారు.
మీ ఇంట్లో చెత్త పక్క ఇంట్లో బంగారం అవుతుందా?
విజయనగరం పార్లమెంట్ పరిధిలోని ఏడుగురు వైసీపీ ఎమ్మెల్యేలు అందినకాడికి దోచుకుంటున్నారు. ఎచ్చెర్ల ఎమ్మెల్యే వేధింపులు తట్టుకోలేక సాక్షి విలేకరి ఆత్మహత్య చేసుకున్నాడు. ఎమ్మెల్యేపై జగన్ రెడ్డి ఎందుకు కేసు పెట్టలేదు? ఇంకెంతమందిని బలి తీసుకుంటారు?... అంటూ చంద్రబాబు మండిపడ్డారు.
