Cyberabad: హైదరాబాద్‌లో సన్ బర్న్ వేడుకలకు అనుమతినివ్వలేదు: సైబరాబాద్ సీపీ
- నిర్వాహకులు దరఖాస్తు చేసుకున్నారు కానీ అనుమతివ్వలేదన్న సీపీ అవినాశ్ మహంతి
- ఇది ఇతర నగరాల్లో జరిగే సన్ బర్న్ వంటిది కాదన్న సీపీ మహంతి
- అందుకే అనుమతులు నిరాకరించామని వెల్లడి
2024 నూతన సంవత్సర వేడుకల సందర్భంగా హైదరాబాద్‌లో సన్ బర్న్ ఈవెంట్‌కు అనుమతుల్లేవని సైబరాబాద్ నగర పోలీస్ కమిషనర్ అవినాశ్ మహంతి తెలిపారు. సన్ బర్న్ పేరిట నిర్వహించతలపెట్టిన కార్యక్రమంపై పెద్ద ఎత్తున దుమారం చెలరేగింది. ఈ నేపథ్యంలో సీపీ మహంతి స్పందించారు. ఈ ఈవెంట్ నిర్వహణకు నిర్వాహకులు తమ వద్ద దరఖాస్తు చేసుకున్నారని, కానీ తాము అనుమతి ఇవ్వలేదన్నారు.
మాదాపూర్‌లోని హైటెక్ సిటీ సమీపంలో ఈ ఈవెంట్‌ను ఏర్పాటు చేసేందుకు సిద్ధపడ్డారన్నారు. అయితే ఇది ఇతర నగరాల్లో జరిగే సన్ బర్న్ వంటి వేడుక కాదని, అందుకే అనుమతులు నిరాకరించినట్లు వెల్లడించారు. ఇదిలా ఉండగా, ఈ ఈవెంట్ వ్యవహారంపై ముఖ్యమంత్రి రేవంత్ రెడ్డి తీవ్రంగా స్పందించిన విషయం తెలిసిందే. ఈవెంట్‌ను సైబరాబాద్ పోలీసులు అనుమతి ఇవ్వకున్నా ఆన్‌లైన్‌లో టిక్కెట్ విక్రయాలు జరపడం చర్చనీయాంశంగా మారింది.
