Juno: భీతిగొలిపేలా ఉన్న గురు గ్రహం ఉత్తర ధ్రువం... నాసా ఆసక్తికర ఫొటో ఇదిగో!
- గురు గ్రహంపై పరిశోధనల కోసం 2011లో జునో ప్రయోగం
- 2016లో బృహస్పతి కక్ష్యలోకి ప్రవేశించిన జునో
- ఇటీవల 54వ సారి గురు గ్రహానికి సమీపంలోకి వెళ్లిన వైనం
అమెరికా అంతరిక్ష పరిశోధన సంస్థ నాసా గురు గ్రహంపై పరిశోధనల నిమిత్తం రోదసిలోకి జునో అనే స్పేస్ క్రాఫ్ట్ ను పంపింది. 2011లో రోదసిలోకి దూసుకెళ్లిన ఈ వ్యోమనౌక 2016లో గురు గ్రహం కక్ష్యలోకి ప్రవేశించింది. జునో తాజాగా పంపిన ఫొటో బృహస్పతి ముఖాకృతి ఎంత భయానకంగా ఉందో చెబుతోంది.
ఈ ఫొటో గురు గ్రహం ఉత్తర ధ్రువానికి సంబంధించినది. ఒక భీకరమైన రాక్షస ముఖంగా గురు గ్రహం ఉత్తర ధ్రువం ఈ ఫొటోలో దర్శనమిస్తోంది. ఈ ఫొటోలో బృహస్పతిపై సగం చీకటి, సగం వెలుతురు ఉండడాన్ని చూడొచ్చు. అంతేకాదు, గురుగ్రహం ఉపరితలంపై భయంకరమైన తుపాను వలయాలు ఆవృతమై ఉన్నాయి.
సూర్యకాంతి గురుగ్రహంపై పడే కోణం నుంచి ఈ ఫొటోను జునో క్లిక్ మనిపించింది. గురు గ్రహం కక్ష్యలో పరిభ్రమిస్తున్న ఈ అంతరిక్ష నౌక ఇటీవల 54వ పర్యాయం గురుగ్రహానికి సమీపంలోకి వెళ్లినప్పుడు ఈ ఫొటో తీసింది. ప్రస్తుతం శాస్త్రవేత్తలు ఈ ఫొటోలోని అంశాలను విశ్లేషించే పనిలో పడ్డారు.
