Prabhas: మంచు విష్ణు కలల ప్రాజెక్టు ‘కన్నప్ప’లోకి ప్రభాస్​!

హిట్స్, ఫ్లాప్స్‌తో సంబంధం లేకుండా వరుసగా సినిమాలు చేసే టాలీవుడ్ హీరోల్లో మంచు విష్ణు ఒకరు. ‘భక్త కన్నప్ప’ తన కలల ప్రాజెక్టు అని చెబుతుండే విష్ణు ఈ మధ్య ‘కన్నప్ప’ అనే టైటిల్ తో ఆ చిత్రాన్ని ప్రారంభించారు. విష్ణు హీరోగా, నుపూర్ సనన్ హీరోయిన్‌గా నటిస్తున్న ఈ సినిమా హైదరాబాద్‌లో పూజా కార్యక్రమాలతో మొదలైంది. మోహన్‌ బాబు నిర్మాతగా వ్యవహరిస్తున్న ఈ చిత్రానికి ముఖేశ్ కుమార్ సింగ్ దర్శకత్వం వహిస్తున్నారు. ప్రస్తుతం విదేశాల్లో షూటింగ్ జరుగుతున్నట్లు తెలుస్తోంది. తాజాగా ఈ సినిమా నుంచి ఆసక్తికర విషయం బయటకు వచ్చింది. 

మంచు విష్ణు కలల ప్రాజెక్టులో రెబల్ స్టార్ ప్రభాస్ కీలక పాత్ర పోషిస్తాడన్న వార్త హల్ చల్ చేస్తోంది. ప్రముఖ విమర్శకుడు రమేష్ బాలా  ఈ విషయాన్ని ట్విట్టర్‌‌లో వెల్లడించారు. సినిమాలో ప్రభాస్ ఓ ముఖ్యమైన పాత్ర పోషిస్తున్నారని విశ్వసనీయవర్గాల ద్వారా తెలిసిందని పేర్కొన్నారు. ఈ ట్వీట్ కి మంచు విష్ణు బదులిస్తూ.. 'హరహర మహాదేవ్' అంటూ రీట్వీట్ చేశాడు. దాంతో, ప్రభాస్ నిజంగానే ఈ చిత్రంలో నటిస్తున్నాడా? నటిస్తే ఏ పాత్రలో కనిపిస్తాడు? అన్నది ఆసక్తి కలిగిస్తోంది.
.