tv: కాల్పులు జరిపిన మనోజ్‌ను నేను కాదు.. పరువుకు భంగం కలిగించారు: టీవీ నటుడు
- శామీర్ పేట సెలబ్రిటీ క్లబ్ లో కాల్పులు
- సిద్ధార్థదాస్ అనే వ్యక్తిపై మనోజ్ కాల్పులు
- టీవీ నటుడు మనోజ్ ఫోటోలు చూపించిన పలు ఛానల్స్
- ఆ కాల్పులు జరిపింది తాను కాదంటూ నటుడు మనోజ్ వివరణ
శామీర్‌పేట సెలబ్రిటీ క్లబ్‌లో కాల్పుల ఘటన కలకలం రేపింది. సిద్ధార్థదాస్ అనే వ్యక్తిపై మనోజ్ కుమార్ ఎయిర్ గన్ తో కాల్పులు జరిపాడు. అయితే ఈ కాల్పుల నుండి సిద్ధార్థ తప్పించుకొని, శామీర్ పేట పోలీస్ స్టేషన్ లో ఫిర్యాదు చేశాడు. ఈ కాల్పులు జరిపిన మనోజ్ పలు టీవీ సీరియళ్లలో నటించాడంటూ ప్రచారం సాగింది. దీనిపై టీవీ సీరియల్స్ నటుడు మనోజ్ తన ఇన్‌స్టాగ్రామ్ వేదికగా వివరణ ఇచ్చారు.
తాను కార్తీక దీపంలో ప్రేమ్ గా నటించానని, ఇప్పుడు మౌనపోరాటంలో నటిస్తున్నానని, ఈ రోజు ఉదయం నుండి ఓ తప్పుడు వార్త జోరుగా చక్కర్లు కొడుతోందని వాపోయాడు. సెలబ్రిటీ క్లబ్ లో కాల్పులు జరిపిన మనోజ్ కు బదులు తన ఫోటోలను వినియోగిస్తున్నారని, తన సీరియల్ క్లిప్స్ వీడియోలు వేస్తున్నారని ఆవేదన వ్యక్తం చేశారు.
ఈ విషయం తెలిసి తన స్నేహితులు, బంధువులు ఫోన్ చేసి చెప్పారని, మొదట ఇది ఫ్రాంక్ కాల్ అనుకున్నానని, ఆ తర్వాత టీవీలలో తన ఫోటో రావడం చూసి వివరణ ఇస్తున్నట్లు చెప్పారు. ఈ రోజు ఉదయం తాను బెంగళూరులో ఉన్నానని, తనకు ఈ కేసుతో ఎలాంటి సంబంధం లేదని చెప్పారు. కొన్ని మీడియా సంస్థలు మనోజ్ అంటే తన ఫోటోలను ఎలా ప్రదర్శించాయని, నా పరువుకు భంగం కలిగించినందుకు ఫిర్యాదు చేయబోతున్నట్లు చెప్పారు.
