నోయిడా కంపెనీ పిల్లల దగ్గు మందుపై డబ్ల్యూహెచ్ఓ అలర్ట్!

నోయిడాకు చెందిన మారియన్ బయోటెక్ దగ్గు మందులపై ప్రపంచ ఆరోగ్య సంస్థ సంచలన నిర్ణయం తీసుకుంది. ఈ కంపెనీ తయారుచేసిన రెండు దగ్గు మందులు నాణ్యత ప్రమాణాలకు అనుగుణంగా లేవని హెచ్చరించింది. చిన్నపిల్లలకు ఆ మందులు వాడొద్దని సూచిస్తూ తన వెబ్ సైట్ ద్వారా అలర్ట్ చేసింది. ఇటీవల ఉజ్బెకిస్థాన్ లో దగ్గు మందు తాగిన 18 మంది చిన్నారులు ప్రాణాలు పోగొట్టుకోవడం తెలిసిందే! ఈ నేపథ్యంలో ప్రపంచ ఆరోగ్య సంస్థ ఈ అలర్ట్ జారీ చేసింది.

మారియన్ బయోటెక్ తయారుచేసిన దగ్గు మందులు అంబ్రోనాల్, డాక్-1 మాక్స్ సిరప్ లు నాణ్యత ప్రమాణాలకు అనుగుణంగా లేవని డబ్ల్యూహెచ్ఓ ప్రకటించింది. ఈ ఉత్పత్తుల నాణ్యత, భద్రతలకు సంబంధించి మారియన్ బయోటెక్ ఎలాంటి గ్యారంటీ ఇవ్వలేదని తెలిపింది. చిన్నారుల మరణం తర్వాత ఉజ్బెకిస్థాన్ లోని నేషనల్ క్వాలిటీ కంట్రోల్ లేబరేటరీస్ నాణ్యత పరీక్ష చేపట్టిందని పేర్కొంది.

ఈ రెండు సిరప్ లలో డైథలీన్ గ్లైకోల్, ఇతిలీన్ గ్లైకోల్ చాలా ఎక్కువ పరిమాణంలో ఉన్నట్లు ఈ పరీక్షలలో తేలిందని వెల్లడించింది. దీంతో చిన్న పిల్లలకు ఈ మందులు వాడొద్దని ఉజ్బెకిస్థాన్ ప్రజలకు ప్రపంచ ఆరోగ్య సంస్థ సూచించింది. ఉజ్బెకిస్థాన్ లో చిన్న పిల్లల మరణాల నేపథ్యంలో మారియన్ బయోటెక్ కంపెనీ లైసెన్సును ఉత్తరప్రదేశ్ ప్రభుత్వం సస్పెండ్ చేసింది. మందుల తయారీని వెంటనే నిలిపివేయాలని అప్పట్లోనే ఆదేశించింది.