Harish Rao: చిన్న వయసులోనే రోగాలు రావడానికి కారణం ఇదే: హరీశ్ రావు

మారిన ఆహారపు అలవాట్లు, జీవనశైలి కారణంగానే చిన్న వయసులోనే ప్రజలు రోగాల బారిన పడుతున్నారని తెలంగాణ మంత్రి హరీశ్ రావు అన్నారు. రొమ్ము క్యాన్సర్ మహమ్మారి ఇప్పుడు ప్రపంచాన్నే వణికిస్తోందని... ఒకప్పుడు పెద్ద వయసులో మాత్రమే కనిపించిన ఈ క్యాన్సర్... ఇప్పుడు 30 - 40 ఏళ్ల వయసు వారిలో కూడా కనిపిస్తోందని చెప్పారు. 

ప్రపంచ బ్రెస్ట్ క్యాన్సర్ నెల సందర్భంగా నిర్వహించిన అవగాహన నడక, మారథాన్ కార్యక్రమం సందర్భంగా మాట్లాడుతూ ఆయన ఈ వ్యాఖ్యలు చేశారు. బ్రెస్ట్ క్యాన్సర్ పై అవగాహన కల్పించడం కోసం ఈ కార్యక్రమాన్ని చేపట్టడం గొప్ప విషయమని అన్నారు. అన్ని జిల్లాల్లో ఇలాంటి కార్యక్రమాలను చేపట్టాల్సిన అవసరం ఉందని చెప్పారు. చాప కింద నీరులా విస్తరిస్తున్న బ్రెస్ట్ క్యాన్సర్ గురించి ప్రజల్లో చైతన్యం తీసుకురావాల్సిన అవసరం ఉందని తెలిపారు.