Sharath Kumar: 'కాంచన' చూసిన రజనీ సార్ ఒక్కటే ఒక మాటన్నారు: శరత్ కుమార్

శరత్ కుమార్ విభిన్నమైన .. విలక్షణమైన పాత్రలను పోషించిన సినిమాలలో 'కాంచన' ఒకటి. ఆ సినిమాను గురించి ఆయన తాజా ఇంటర్వ్యూలో ప్రస్తావించారు. 'కాంచన' సినిమా కోసం లారెన్స్ నన్ను కలిశాడు. ఆ సినిమా కథ మొత్తం చెప్పిన తరువాత, అందులోని ట్రాన్స్ జెండర్ పాత్రను నేను వేయాలని అన్నాడు. దాంతో నేను ఆలోచనలో పడ్డాను. నా పర్సనాలిటీకి ట్రాన్స్ జెండర్ పాత్ర సెట్ అవుతుందా? ఆడియన్స్ ఆ పాత్రలో నన్ను అంగీకరిస్తారా? అనే ఆలోచనలో పడ్డాను. అదే మాటను నేను లారెన్స్ తో అన్నాను. ఈ పాత్ర ద్వారా ఒక మెస్సేజ్ వెళుతుంది .. మీరు చేస్తేనే బాగుంటుంది అని లారెన్స్ అన్నాడు. ఈ సినిమా రిలీజ్ అయిన తరువాత ఈ పాత్రకి వచ్చిన రెస్పాన్స్ అంతా ఇంతా కాదు. 
ఆ తరువాత ఒక సందర్భంలో రజనీ సార్ ను కలిశాను. అప్పుడు ఆయన 'కాంచన' గురించి ప్రస్తావించారు. "అందరూ ఈ సినిమాను గురించే మాట్లాడుకుంటున్నారయ్యా. అంతగా ఈ సినిమాలో ఏవుందా అని చూశాను. అప్పటివరకూ ఒకలా సాగుతూ వచ్చిన సినిమా, నీ ఎంట్రీ నుంచి అదిరిపోయింది. అక్కడి నుంచి సినిమా ఎక్కడికో వెళ్లిపోయింది" అని అన్నారంటూ చెప్పుకొచ్చారు.