ఈ నెల 23 నుంచే ఫ్లిప్‌కార్ట్‌ బిగ్‌ బిలియన్‌ డే సేల్.. వివరాలు ఇవిగో

13-09-2022 Tue 22:30 | Business
  • ఈ నెల 30వ తేదీ వరకు ప్రత్యేక సేల్ కొనసాగుతుందని ప్రకటన
  • ఐసీఐసీఐ, యాక్సిస్ బ్యాంకు క్రెడిట్, డెబిట్ కార్డులపై 10 శాతం డిస్కౌంట్
  • కేవలం ఒక్క రూపాయి చెల్లించి వస్తువులు బుక్ చేసుకునే అవకాశం
Flipkart big billion days sale dates announced
ప్రముఖ ఈ కామర్స్ సంస్థ ఫ్లిప్ కార్ట్ ఏటా నిర్వహించే బిగ్ బిలియన్ డేస్ సేల్ తేదీలను ప్రకటించింది. ఈ సేల్ కు సంబంధించి కొన్ని రోజులుగా ప్రకటనలతో ఊరిస్తూ వచ్చిన ఫ్లిప్ కార్ట్ సంస్థ.. ఈ నెల 23వ తేదీ నుంచి 30వ తేదీ వరకు ‘బిగ్ బిలియన్ డేస్’ సేల్ ను నిర్వహించనున్నట్టు తాజాగా ప్రకటించింది. సరిగ్గా ఇదే తేదీన అటు మరో ఈ కామర్స్ దిగ్గజం అమెజాన్ కూడా తమ ‘గ్రేట్ ఇండియన్ సేల్’ను ప్రారంభిస్తుండటం గమనార్హం. 

ఎలక్ట్రానిక్ పరికరాలపై భారీ డిస్కౌంట్..
  • ఫ్లిప్ కార్ట్ సంస్థ ఏటా దసరా, దీపావళి పండుగల నేపథ్యంలో ‘బిగ్ బిలియన్ డేస్’ పేరిట ఆఫర్ సేల్ ను నిర్వహిస్తుంది. అదే క్రమంలో ఈసారి సేల్ చేపట్టింది.
  • ఎనిమిది రోజుల పాటు జరిగే ఈ ప్రత్యేక సేల్‌ లో స్మార్ట్‌ ఫోన్లు, ల్యాప్‌ ట్యాప్‌ లు, స్మార్ట్‌ వాచ్‌ లు వంటి ఎలక్ట్రానిక్ పరికరాలు, వాటి యాక్సెసరీస్‌ పై భారీగా డిస్కౌంట్లను అందించనున్నట్టు ప్రకటించింది.
  • బిగ్ బిలియన్ డేస్ సేల్ లో ఐసీఐసీఐ, యాక్సిస్‌ బ్యాంక్‌ డెబిట్, క్రెడిట్‌ కార్డులపై 10 శాతం ఇన్‌స్టంట్‌ డిస్కౌంట్‌ ఇవ్వనున్నట్టు ఫ్లిప్‌ కార్ట్‌ ప్రకటించింది. వీటితోపాటు పేటీఎం యూపీఐ, వాలెట్‌ లావాదేవీలపైనా 10 శాతం దాకా తగ్గింపు ఇస్తున్నట్టు తెలిపింది.
  • ప్రత్యేక సేల్ లో భాగంగా.. ఆఫర్ కొనసాగే రోజుల్లో అర్ధరాత్రి 12 గంటలకు, ఉదయం 8 గంటలకు, సాయంత్రం 4 గంటలకు రష్‌ అవర్స్‌ పేరిట ప్రత్యేక డీల్స్‌ అందుబాటులో ఉంటాయని ఫ్లిప్ కార్ట్ వివరించింది. 
  • పోకో ఎఫ్‌ 4, పోకో ఎక్స్ 4 ప్రో 5జీ, గూగుల్ పిక్సల్‌ 6ఏ, ఒప్పో రెనో 8, మోటోరొలా ఎడ్జ్‌ 30, రియల్‌ మీ 9 5జీ, పోకో సీ 31, వివో టీ1 5జీ, శాంసంగ్‌ ఎఫ్‌ 13 ఫోన్లపై డిస్కౌంట్లు ఉండబోతున్నట్టు పేర్కొంది.
  • ఆఫర్ సమయంలో కేవలం ఒక్క రూపాయి చెల్లించి వస్తువులను ముందుగానే బుక్ చేసుకునే అవకాశం ఉంటుందని ఫ్లిప్ కార్ట్ తెలిపింది.