విమానంలో కలకలం.. ప్రయాణికుడి మొబైల్ ఫోన్ నుంచి మంటలు

గగనతలంలో ప్రయాణిస్తున్న విమానంలో కలకలం రేగింది. ఓ ప్రయాణికుడి మొబైల్ ఫోన్ నుంచి మంటలు లేచాయి. ఇది చూసి తోటి ప్రయాణికులు కంగారు పడ్డారు. వెంటనే స్పందించిన క్యాబిన్ సిబ్బంది అగ్నిమాపక యంత్రంతో మంటలను ఆర్పివేశారు. ఈ విషయాన్ని పౌర విమానయాన శాఖ డైరెక్టరేట్ జనరల్ వర్గాలు తెలిపాయి. 

ఈ ప్రమాదం కారణంగా ఎవరికీ గాయాలు కాలేదు. విమాన సిబ్బంది కూడా క్షేమంగా ఉన్నట్టు అధికార వర్గాలు వెల్లడించాయి. ఇండిగో సంస్థకు చెందిన 6ఈ 2037 విమానం అసోంలోని దిబ్రూగఢ్ నుంచి ఢిల్లీకి వెళుతుండగా గురువారం ఈ ప్రమాదం చోటు చేసుకుంది. ప్రయాణికుడి ఫోన్ నుంచి మంటలు, పొగ రావడాన్ని గమనించిన విమాన సిబ్బందిలో ఒకరు వేగంగా స్పందించి అగ్నిమాపక యంత్రం సాయంతో ఆర్పివేయడం వల్ల పెద్ద ప్రమాదం తప్పింది. సదరు విమానం సురక్షితంగా ఢిల్లీ విమానాశ్రయంలో ల్యాండ్ అయింది.