Air Crash: మిస్టరీగా మారిన చైనా విమాన ప్రమాద ఘటన!

చైనాలో ఇటీవల 132 మందితో వెళుతున్న బోయింగ్ విమానం ఓ పర్వత ప్రాంతంలో కుప్పకూలిన సంగతి తెలిసిందే. ఈ విమాన ప్రమాద ఘటన ఓ మిస్టరీగా మారింది. ఇప్పటివరకు ఆ విమానంలోని వారి ఆచూకీ తెలియరాలేదు. వారి మృతదేహాలు కూడా లభ్యం కాలేదు. 

విమాన ప్రమాదం ఎలా జరిగిందో తెలుసుకునేందుకు కాక్ పిట్ వాయిస్ రికార్డర్ (సీవీఆర్), ఫ్లయిట్ డేటా రికార్డర్ (ఎఫ్ డీఆర్) ఎంతో కీలకం. ఈ బ్లాక్ బాక్స్ లను విశ్లేషిస్తే విమాన ప్రమాదానికి గల కారణాలు వెల్లడయ్యే అవకాశం ఉంది. ఇప్పటికే కాక్ పిట్ వాయిస్ రికార్డర్ ను కనుగొన్న సహాయక బృందాలు, తాజాగా ఫ్లయిట్ డేటా రికార్డర్ ను కూడా స్వాధీనం చేసుకున్నాయి. 

కాగా, ఈ విమానం గాల్లోనే అధిక పీడనంతో పేలిపోయి నేలకూలి ఉంటుందని భావిస్తున్నారు. విమానం కూలిపోయిన ప్రదేశానికి పది కిలోమీటర్ల దూరంలో ఓ శకలాన్ని గుర్తించారు. ఆశ్చర్యకరంగా మృతదేహాలేవీ లభ్యం కాలేదు. దాంతో ఈ విమాన ప్రమాద మృతులపై అధికారిక ప్రకటన ఇంకా రాలేదు. అయితే విమానం కూలిపోయి, దగ్ధమైన తీరు చూస్తుంటే ఏ ఒక్కరూ ప్రాణాలతో ఉండే అవకాశాల్లేవని తెలుస్తోంది.