Kalyan: 'ఆర్ ఆర్ ఆర్' టీమ్ చేతుల మీదుగా 'అధీర' టీజర్ రిలీజ్!

మొదటి నుంచి కూడా దర్శకుడు ప్రశాంత్ వర్మ విభిన్నమైన కథలను తెరకెక్కిస్తూ వస్తున్నాడు. ప్రస్తుతం ఆయన సూపర్ హీరో కాన్సెప్ట్ తో తేజ సజ్జ హీరోగా 'హను మాన్' సినిమాను రూపొందిస్తున్నాడు. ఆ తరువాత సినిమాను కూడా ఆయన అదే జోనర్లో చేస్తుండటం విశేషం. ఈ సినిమాతో నిర్మాత డీవీవీ దానయ్య తనయుడు కల్యాణ్ హీరోగా పరిచయమవుతున్నాడు.

ఈ సినిమాకి 'అధీర' అనే టైటిల్ ను ఖరారు చేశారు. నిరంజన్ రెడ్డి నిర్మిస్తున్న ఈ సినిమా నుంచి తాజాగా టీజర్ వదిలారు. రాజమౌళి .. ఎన్టీఆర్ .. చరణ్ కలిసి ఈ టీజర్ ను రిలీజ్ చేశారు. ఈ సినిమాలో హీరో చిన్నప్పటి నుంచి తన శరీరంలో అరుదైన ఎలక్ట్రిక్ పవర్ ను కలిగి ఉంటాడు. పెద్దైన తరువాత ఆ శక్తినే అతను ఆయుధంగా చేసుకుంటాడు. 

ఒక సూపర్ హీరోగా ఆ శక్తిని ఉపయోగించి దుర్మార్గులను ఎదుర్కోవడం .. సామాన్యులను కాపాడటం చేస్తుంటాడు. టైటిల్ కి తగినట్టుగానే హీరోను చాలా పవర్ఫుల్ గా చూపించారు. ఇక మిగతా వివరాలు త్వరలోనే తెలియనున్నాయి. మొత్తానికి మరో బడా నిర్మాత ఫ్యామిలీ నుంచి ఓ హీరో వస్తున్నాడన్న మాట.