Finland: ప్రపంచంలోనే అత్యంత సంతోషదాయకమైన దేశం ఇదే!

యూరప్ దేశం ఫిన్లాండ్ మరోసారి తన ప్రత్యేకతను చాటుకుంది. ప్రపంచంలోనే అత్యంత సంతోషదాయకమైన దేశాల జాబితాలో ప్రథమస్థానంలో నిలిచింది. ఫిన్లాండ్ ఈ జాబితాలో నెంబర్ వన్ గా నిలవడం ఇది వరుసగా ఐదోసారి. ఈ జాబితాలో ఫిన్లాండ్ తర్వాత డెన్మార్క్ (2), ఐస్ లాండ్ (3), స్విట్జర్లాండ్ (4), నెదర్లాండ్స్(5), లగ్జెంబర్గ్ (6), స్వీడన్ (7), నార్వే (8), ఇజ్రాయెల్ (9), న్యూజిలాండ్ (10) టాప్-10లో నిలిచాయి. అగ్రరాజ్యం అమెరికా ఈ ఆనందమయ దేశాల జాబితాలో 16వ స్థానంలో ఉంది. కెనడా ఓ మెట్టుపైన 15వ స్థానంలో నిలిచింది. బ్రిటన్ కు 17వ స్థానం లభించింది.

136వ స్థానంలో భారత్
ప్రపంచ సంతోషదాయక దేశాల జాబితాలో భారత్ 136వ స్థానంలో నిలిచింది. ఈ జాబితాలో పొరుగుదేశాలు పాకిస్థాన్, శ్రీలంక ముందున్నాయి. పాకిస్థాన్ 121వ ర్యాంకు దక్కించుకోగా, శ్రీలంక 127వ స్థానంలో ఉంది.
ఆఫ్ఘనిస్థాన్ కు చివరిస్థానం
ఈ ఐక్యరాజ్యసమితి ప్రాయోజిత సూచికలో అత్యంత అశాంతి కలిగిన దేశంగా ఆఫ్ఘనిస్థాన్ (146) నిలిచింది. సంతోషదాయక దేశాల జాబితాలో ఆఫ్ఘన్ అన్నిటికంటే అట్టడుగున నిలిచింది. ఆఫ్ఘన్ కు పైన లెబనాన్, జింబాబ్వే దేశాలు నిలిచాయి.