Naveen Polishetty: హీరోగా బిజీ అవుతున్న నవీన్ పోలిశెట్టి!

టాలీవుడ్ లో ఇప్పుడు అల్లరి నరేశ్ తరువాత కామెడీని నాన్ స్టాప్ గా నడిపించగల కథానాయకుడిగా నవీన్ పోలిశెట్టి పేరు వినిపిస్తోంది. 'ఏజెంట్ సాయి శ్రీనివాస ఆత్రేయ' టైటిల్ తో మంచి హిట్ అందుకున్న నవీన్, ఈ మధ్య వచ్చిన 'జాతిరత్నాలు'తో మరో హిట్ ను తన ఖాతాలో వేసుకున్నాడు.

ఆయనతో సినిమాలు చేయడానికి పెద్ద పెద్ద బ్యానర్లు ముందుకు వస్తుండటం విశేషం. సితార బ్యానర్ తో కలిసి నవీన్ తో ఒక సినిమాను నిర్మించడానికి త్రివిక్రమ్ సిద్ధమవుతున్నారు. ఈ సినిమాతో ఒక కొత్త దర్శకుడు పరిచయమవుతున్నాడు. ఇక యూవీ క్రియేషన్స్ వారు కూడా నవీన్ తో ఒక సినిమాను చేస్తున్నారు. నిన్న నవీన్ బర్త్ డే సందర్భంగా సదరు నిర్మాతలు ఒక పోస్టర్ ను కూడా వదిలారు.

ఈ సినిమాలో అనుష్క ఒక కీలకమైన పాత్రను పోషించనున్నట్టుగా తెలుస్తోంది. ఇంతకుముందు ఈ బ్యానర్లో అనుష్క 'మిర్చి' .. ' భాగమతి' సినిమాలు చేసింది. ఇప్పుడు ఈ సినిమాలోను ఆమె కనిపించనుందని అంటున్నారు. ఈ సినిమాకి మహేశ్ పి. దర్శకత్వం వహించనున్నాడు. త్వరలోనే ఈ సినిమాకి టైటిల్ ను ఖరారు చేసి, మిగతా విషయాలను వెల్లడించనున్నారు.