ఓ నెటిజన్ చేసిన తీవ్ర వ్యాఖ్యలపై సమంత స్పందన ఇదిగో!

టాలీవుడ్ లో క్యూట్ కపుల్ గా గుర్తింపు తెచ్చుకున్న నాగచైతన్య, సమంత కొంతకాలం కిందట విడిపోతున్నట్టు ప్రకటించడం తెలిసిందే. వారి కాపురంలో కలతలపై తీవ్రస్థాయిలో ఊహాగానాలు వచ్చాయి. విడాకుల ప్రకటనతో ఆ ఊహాగానాలకు అడ్డుకట్ట పడినప్పటికీ, సమంతపై ట్రోలింగ్ మరింత ఎక్కువైంది.

తాజాగా ఓ నెటిజన్ దారుణమైన రీతిలో స్పందించాడు. సమంత విడాకులు తీసుకుని నాశనమైన ఓ సెకండ్ హ్యాండ్ ఐటమ్ అంటూ వ్యాఖ్యానించాడు. అంతేకాదు, ఓ జెంటిల్మన్ నుంచి అప్పనంగా రూ.50 కోట్లు దోచుకుందని తీవ్ర ఆరోపణ చేశాడు. ఈ మేరకు అతడు ట్వీట్ చేశాడు. దీనిపై సమంత స్పందించింది. "నీ ఆత్మను దేవుడు దీవించుగాక" అంటూ వ్యాఖ్యానించింది.

ఈ సందర్భంగా నెటిజన్లలో అత్యధికులు సమంతకు మద్దతుగా నిలిచారు. ఇలాంటి కామెంట్లకు స్పందించడం అనవసరం అని, తామంతా సమంతకు బాసటగా ఉంటామని పేర్కొన్నారు. సమంత ఇలాంటి దుష్ప్రచారాన్ని పట్టించుకోకుండా సినిమాలపై దృష్టి సారించాలని పలువురు సూచించారు.