Ram Gopal Varma: దుబాయ్ లో ఓ పోలీస్ స్టేషన్ ను చూసి సంభ్రమాశ్చర్యాలకు గురైన రామ్ గోపాల్ వర్మ

దర్శకుడు రామ్ గోపాల్ వర్మ ఇటీవల దుబాయ్ వెళ్లారు. 'లడ్కీ' చిత్రం ప్రమోషన్ ఈవెంట్ ను దుబాయ్ లోని ప్రఖ్యాత బుర్జ్ ఖలీఫా టవర్స్ లో నిర్వహించగా, ఆ కార్యక్రమంలో వర్మ పాల్గొన్నారు. కాగా, దుబాయ్ పర్యటనలో భాగంగా వర్మ అక్కడ ఓ స్మార్ట్ పోలీస్ స్టేషన్ ను సందర్శించి విపరీతమైన సంభ్రమాశ్చర్యాలకు లోనయ్యారు. ఓ పోలీస్ స్టేషన్ ఇంత అందంగా ఉంటుందని తాను ఏమాత్రం ఊహించలేదని అన్నారు. ఈ మేరకు వర్మ కామెంట్స్ తో కూడిన వీడియోను దుబాయ్ పోలీసులు ఇన్ స్టాగ్రామ్ లో పంచుకోగా, ఆ వీడియోను వర్మ ట్వీట్ చేశారు.

ఈ వీడియోలో వర్మ మాట్లాడుతూ, దుబాయ్ స్మార్ట్ పోలీస్ స్టేషన్ ను చూస్తుంటే ఓ సైన్స్ ఫిక్షన్ సినిమా చూస్తున్నట్టుగా ఉందని, ప్రతి అంశం అద్భుతంగా ఉందని వివరించారు. భారత్ లో పోలీస్ స్టేషన్లు ఎలా ఉంటాయో, అందుకు పూర్తి విరుద్ధంగా దుబాయ్ స్మార్ట్ పోలీస్ స్టేషన్ ఉందని, ఈ విషయాన్ని తాను కళ్లారా చూశానని తెలిపారు. ఈ పోలీస్ స్టేషన్ ను చూసిన తర్వాత "బ్యూటిఫుల్" అనే మాట ఉపయోగించక తప్పడంలేదని అన్నారు. ఇంత స్మార్ట్ గా, అత్యున్నత సాంకేతిక పరిజ్ఞానంతో ఉన్న పోలీస్ స్టేషన్ ను ఇతర దేశాలు కాపీ కొట్టడం ఖాయమని పేర్కొన్నారు.