ఇక నుంచి నన్ను 'తాలా' అని పిలవొద్దు: హీరో అజిత్ స్పష్టీకరణ

తమిళ స్టార్ హీరో అజిత్ ను అభిమానులు, మీడియా 'తాలా' అని సంబోధిస్తుండడం తెలిసిందే. తమిళంలో 'తాలా' అంటే నాయకుడు అని అర్థం. అయితే ఇక నుంచి తనను ఎవరూ 'తాలా' అని, మరే ఇతర బిరుదులతో కానీ పిలవొద్దని అజిత్ స్పష్టం చేశారు. తన పేరుకు ముందు 'తాలా' అనే బిరుదును ఇకమీదట రాయొద్దని తెలిపారు. ఈ మేరకు అజిత్ ఓ ప్రకటన విడుదల చేశారు.

తన గురించి రాయాల్సి వస్తే అజిత్, అజిత్ కుమార్ అనో, లేక 'ఏకే' అని మాత్రమే రాయాలని ఆ ప్రకటనలో వివరించారు. ఆయన ఏ కారణంతో ఈ సూచన చేశారన్నది ప్రకటనలో వెల్లడించలేదు. ఆయురారోగ్యాలు, సుఖశాంతులు, విజయం, ప్రశాంతతతో కూడిన జీవితం ప్రతి ఒక్కరికీ దక్కాలని ఆకాంక్షిస్తున్నట్టు అజిత్ తన ప్రకటనలో పేర్కొన్నారు.