Nikhil: మరోసారి సెట్ అయిన 'స్వామిరారా' కాంబినేషన్!

నిఖిల్ ఎప్పటికప్పుడు తెరపై కొత్తగా కనిపించడానికి తపన పడుతుంటాడు. అందుకోసం విభిన్నమైన కథలను ఎంచుకుంటూ ఉంటాడు. ఆయన తాజా చిత్రంగా '18 పేజెస్' ప్రేక్షకుల ముందుకు వస్తోంది. గీతా ఆర్ట్స్ 2 బ్యానర్ పై నిర్మితమైన ఈ సినిమా, త్వరలో ప్రేక్షకుల ముందుకు రానుంది.

ఇక ఆ తరువాత సినిమాగా ఆయన 'కార్తికేయ 2' చేస్తున్నాడు. చందూ మొండేటి దర్శకత్వంలో రూపొందుతున్న ఈ సినిమా, చిత్రీకరణపరంగా చివరిదశకు చేరుకుంది. ఈ నేపథ్యంలోనే నిఖిల్ మరో ప్రాజెక్టును పట్టాలెక్కిస్తున్నాడు. గతంలో నిఖిల్ తో 'స్వామిరారా' .. 'కేశవ' సినిమాలను తెరకెక్కించిన సుధీర్ వర్మ, ఈ సినిమాకి దర్శకుడిగా వ్యవహరించనున్నాడు.

ఈ సినిమాను బీవీఎస్ఎన్ ప్రసాద్ నిర్మించనున్నాడు. ప్రస్తుతం ఈ ప్రాజెక్టుకు సంబంధించిన సన్నాహాలు జరుగుతున్నాయి. వచ్చే ఏడాదిలో ఈ సినిమా రెగ్యులర్ షూటింగు మొదలుకావొచ్చునని అంటున్నారు. మిగతా వివరాలు త్వరలోనే తెలియనున్నాయి.