Roshan: 'పెళ్లి సందD' రిలీజ్ డేట్ ఖరారు చేస్తూ పోస్టర్ విడుదల!

రోషన్ కథానాయకుడిగా కె.రాఘవేంద్రరావు దర్శకత్వ పర్యవేక్షణలో 'పెళ్లి సందD' సినిమా రూపొందింది. ఆర్కే ఫిలిమ్స్ .. ఆర్కా మీడియా వారు ఈ సినిమాను నిర్మించారు. ఈ సినిమాతో శ్రీలీల తెలుగు తెరకి కథానాయికగా పరిచయమవుతోంది. ఈ సినిమాను దసరాకి విడుదల చేయనున్నట్టుగా వార్తలు వచ్చాయి.

తాజాగా ఈ సినిమా విడుదల తేదీని ఖరారు చేశారు. ఈ నెల 15వ తేదీన ఈ సినిమాను భారీ స్థాయిలో రిలీజ్ చేస్తున్నారు. అందుకు సంబంధించిన పోస్టర్ ను కొంతసేపటి క్రితం వదిలారు. ఇది ఫ్యామిలీ ఎంటర్టైనర్ కావడంతో దసరాకి భారీ వసూళ్లను రాబట్టే అవకాశం ఉన్నట్టుగా భావిస్తున్నారు.

ఈ సినిమాకి కీరవాణి సంగీతాన్ని సమకూర్చగా, సాహిత్యాన్ని చంద్రబోస్ అందించారు. ఇప్పటికే ఈ సినిమా నుంచి వదిలిన పాటలకి మంచి రెస్పాన్స్ వచ్చింది. పాత పెళ్లి సందడిని గుర్తుకు చేస్తుందనే టాక్ అయితే బలంగానే వినిపిస్తోంది. మరి ఆ స్థాయిని మించిన విజయాన్ని ఈ సినిమా సాధిస్తుందేమో చూడాలి.