EngvsInd: వేగంగా 150 వికెట్లు తీసిన బౌలర్‌గా జహీర్ ఖాన్ రికార్డు సమం చేసిన ఉమేశ్ యాదవ్
- 42 టెస్టుల్లో ఈ ఫీట్ సాధించిన పేసర్
- డేవిడ్ మలాన్ వికెట్‌తో జహీర్ రికార్డు సమం
- జాబితాలో అగ్రస్థానంలో కపిల్ దేవ్
- తొలి ఇన్నింగ్సులో ఇంగ్లండ్ 284-9
ఇంగ్లండ్‌లో జరుగుతున్న టెస్టు సిరీస్ తొలి మూడు మ్యాచుల్లో ఆడే అవకాశం దక్కని పేసర్ ఉమేశ్ యాదవ్.. నాలుగో టెస్టులో వచ్చిన అవకాశాన్ని రెండు చేతులా అందిపుచ్చుకున్నాడు. తొలి ఇన్నింగ్సులో మూడు వికెట్లు పడగొట్టాడు. ముఖ్యంగా ఈ సిరీస్‌లో భీకర ఫామ్ ప్రదర్శిస్తున్న ఇంగ్లండ్ కెప్టెన్ జో రూట్‌ను అవుట్ చేసి భారత శిబిరంలో హుషారు నింపాడు.
ఈ క్రమంలోనే 150 వికెట్ల మైలురాయిని కూడా చేరుకున్నాడు. ఇదే సమయంలో అత్యంత వేగంగా 150 వికెట్లు తీసిన భారత బౌలర్ల జాబితాలో మాజీ పేసర్ జహీర్ ఖాన్ రికార్డును సమం చేశాడు. వీళ్లిద్దరూ 49 టెస్టుల్లో 150 వికెట్లు పడగొట్టారు. ఈ జాబితాలో అగ్రస్థానంలో లెజెండరీ క్రికెటర్ కపిల్ దేవ్ (39 టెస్టులు) ఉండగా.. జవగల్ శ్రీనాథ్ (40 టెస్టులు), మహమద్ షమీ (42 టెస్టులు) ఆ తర్వాతి స్థానాల్లో ఉన్నారు.
తొలి ఇన్నింగ్సులో తడబడి 62/5తో నిలిచిన ఇంగ్లండ్ జట్టును ఓ. పోప్(81) ఆదుకున్నాడు. అయితే అతన్ని చివర్లో శార్దూల్ ఠాకూర్ పెవిలియన్ చేర్చాడు. ప్రస్తుతం క్రీజులో క్రిస్ వోక్స్ (37) ఆండర్సన్ (1) ఉన్నారు. ప్రస్తుతం ఇంగ్లండ్ జట్టు 9 వికెట్లు కోల్పోయి 284 పరుగులు చేసింది. భారత బౌలర్లలో ఉమేష్ 3, బుమ్రా 2, జడేజా 2 వికెట్లు తీయగా, సిరాజ్, శార్దూల్ ఠాకూర్ చెరో వికెట్ తీసుకున్నారు.
