Rana Daggubati: 'విరాటపర్వం' విడుదలపై ఆలోచన!

రానా .. సాయిపల్లవి కాంబినేషన్లో 'విరాటపర్వం' రూపొందింది. ఆశలకు .. ఆశయాలకు మధ్య నడిచే ప్రేమకథ ఇది. ఒకవైపున ఉద్యమం .. మరో వైపున భావోద్వేగం .. ఈ రెండింటి మధ్య నడిచే ఆసక్తికరమైన కథ ఇది. సురేశ్ ప్రొడక్షన్స్ బ్యానర్ పై వేణు ఊడుగుల దర్శకత్వంలో రూపొందిన ఈ సినిమాను క్రితం నెలలోనే విడుదల చేయాలనుకున్నారు. అందుకు సంబంధించిన సన్నాహాలు చకచకా పూర్తయ్యాయి. అయితే కరోనా కారణంగా విడుదలను వాయిదా వేసుకున్న సినిమాల జాబితాలో 'విరాటపర్వం' కూడా చేరిపోయింది.

అలా వాయిదాపడిన ఈ సినిమాను ఓటీటీలో విడుదల చేసే అవకాశాలు ఎక్కువగా ఉన్నాయనే వార్తలు వినిపిస్తున్నాయి. ఈ విషయంపై సురేశ్ బాబు ఆలోచన చేస్తున్నారటగానీ ఇంకా నిర్ణయమైతే తీసుకోలేదని అంటున్నారు. ఈ సినిమా థియేటర్ రిలీజ్ అనంతరం డిజిటల్ హక్కులను 'నెట్ ఫ్లిక్స్' వారు అడుగుతున్నట్టుగా ఆ మధ్య వార్తలు వచ్చాయి. మరి ఇప్పుడు నేరుగా డిజిటల్ హక్కులు ఇవ్వాలనుకుంటే ఈ లెక్కలు వేరుగా ఉంటాయి. అందువలన మంచి ఆఫర్ వస్తే చూద్దాం అనే ఉద్దేశంతో సురేశ్ బాబు ఉన్నారని అంటున్నారు. మరి 'విరాటపర్వం' థియేటర్లు తెరుచుకునేవరకూ వెయిట్ చేస్తుందా? లేదంటే డిజిటల్ బాట పడుతుందా? అనేది చూడాలి.