Narendra Modi: బ్రిటన్ పర్యటన రద్దు చేసుకున్న ప్రధాని మోదీ
- జూన్ లో బ్రిటన్ లో జి-7 దేశాల సదస్సు
- మోదీకి ప్రత్యేక ఆహ్వానం పంపిన బోరిస్ జాన్సన్
- భారత్ లో కరోనా ప్రబలం
- దేశానికే ప్రాధాన్యత ఇవ్వాలని మోదీ నిర్ణయం
భారత్ లో కరోనా సంక్షోభం నెలకొని ఉన్న నేపథ్యంలో ప్రధాని నరేంద్ర మోదీ తన బ్రిటన్ పర్యటన రద్దు చేసుకున్నారు. జూన్ లో బ్రిటన్ లోని కార్న్ వాల్ లో జి-7 దేశాల సదస్సు జరగనుండగా, బ్రిటన్ ప్రధాని బోరిస్ జాన్సన్ భారత ప్రధాని మోదీని ప్రత్యేకంగా ఆహ్వానించారు. ఈ సదస్సు జూన్ 11 నుంచి 13వ తేదీ వరకు జరగనుంది.
బ్రిటీష్ ప్రధాని ప్రత్యేకంగా ఆహ్వానించడం సంతోషదాయకమే అయినా, భారత్ లో కరోనా ప్రబలంగా ఉన్న దశలో జి-7 దేశాల సమావేశానికి మోదీ వెళ్లకూడదని నిర్ణయించుకున్నారని భారత విదేశీ వ్యవహారాల మంత్రిత్వ శాఖ అధికార ప్రతినిధి వెల్లడించారు. భారత్ లో కరోనా సంక్షోభ నివారణకే ప్రాధాన్యత ఇస్తున్నారని వివరించారు.
కాగా, ఈ జి-7 దేశాల సదస్సుకు అమెరికా అధ్యక్షుడు జో బైడెన్, బ్రిటన్, కెనడా, ఫ్రాన్స్, జర్మనీ, ఇటలీ, జపాన్ దేశాల అధినేతలు హాజరుకానున్నారు. ఈ సమావేశానికి భారత్ తో పాటు ఆస్ట్రేలియా, దక్షిణ కొరియా దేశాధినేతలను కూడా ప్రత్యేకంగా ఆహ్వానించారు.
