Central Vista: సెంట్రల్ విస్టాను అడ్డుకోవడానికి చేస్తున్న మరో ప్రయత్నమే ఇది: ఢిల్లీ హైకోర్టులో కేంద్రం

కేంద్ర ప్రభుత్వం ఢిల్లీలో అత్యంత ప్రతిష్టాత్మకంగా చేపట్టిన సెంట్రల్ విస్టా ప్రాజెక్ట్ కు వ్యతిరేకంగా దాఖలైన పిటిషన్ ను ఈరోజు ఢిల్లీ హైకోర్టు విచారించింది. విచారణ సందర్భంగా ఈ పిటిషన్ పై కేంద్ర ప్రభుత్వం అసంతృప్తిని వ్యక్తం చేసింది. ప్రాజెక్టును నిలిపివేసేందుకు వ్యతిరేకులు చేస్తున్న మరో ప్రయత్నమే ఇది అని కోర్టు ముందు కేంద్రం పేర్కొంది. ఈ ప్రాజెక్టును అడ్డుకునేందుకు తొలి నుంచి ఎన్నో ప్రయత్నాలు జరుగుతున్నాయని... ఇది కూడా అందులో భాగమేనని చెప్పింది.

ఈ పిటిషన్ ను కొట్టివేయాలని... పిటిషన్ వేసిన వ్యక్తికి జరిమానా విధించాలని కోర్టును కేంద్రం కోరింది. నిర్మాణ ప్రదేశంలో కరోనాకు సంబంధించి అన్ని జాగ్రత్తలు తీసుకుంటున్నామని తెలిపింది. మరోవైపు రాహుల్ గాంధీ సహా ప్రతిపక్ష నేతలంతా ఈ ప్రాజెక్టుపై విమర్శలు గుప్పిస్తున్న సంగతి తెలిసిందే. కరోనాను పట్టించుకోకుండా సెంట్రల్ విస్టాపై దృష్టి సారిస్తున్నారని వారు దుయ్యబడుతున్నారు.