Venkatesh: 'దృశ్యం 2'ను పూర్తిచేసిన వెంకీ!

మలయాళంలో మోహన్ లాల్ కథానాయకుడిగా నటించిన 'దృశ్యం' .. తెలుగులో అదే టైటిల్ తో రూపొంది భారీ విజయాన్ని అందుకుంది. వెంకటేశ్ కెరియర్ లోనే ఇది ఒక ప్రత్యేకమైన చిత్రంగా నిలిచింది. ఇక మలయాళంలో ఆ సినిమాకి సీక్వెల్ గా వచ్చిన 'దృశ్యం 2' కూడా అక్కడ సూపర్ హిట్ గా నిలిచింది. దాంతో మూలకథను హ్యాండిల్ చేసిన జీతూ జోసెఫ్ దర్శకత్వంలోనే తెలుగు రీమేక్ చేస్తున్నారు. 'దృశ్యం 2' పేరుతో రూపొందుతున్న ఈ సినిమాలో, మొదటి భాగంలో చేసిన ఆర్టిస్టులంతా కనిపించనున్నారు.

తెలుగు 'దృశ్యం 2' సినిమా షూటింగ్ నాన్ స్టాప్ గా సాగుతూ వెళుతోంది. 'నారప్ప' తరువాత వెంకటేశ్ పూర్తిగా ఈ సినిమాపైనే దృష్టి పెట్టారు. తాజాగా ఆయన పోర్షన్ కి సంబంధించిన షూటింగు పూర్తయింది. ఇక వెంకటేశ్ 'ఎఫ్ 3' కోసం పూర్తి సమయాన్ని కేటాయించనున్నారు. 'దృశ్యం 2'లో హీరో నేరం చేశాడని నిరూపించడం కోసం పోలీసులు ఒక ప్లాన్ వేస్తారు. ఆ ట్విస్ట్ కి షాక్ కాని ఆడియన్స్ బహుశా ఉండకపోవచ్చు. అందుకు జీతూ జోసెఫ్ ను మెచ్చుకోని వాళ్లుండరు. అనూప్ రూబెన్స్ సంగీతం ఈ సినిమాకి హైలైట్ గా నిలవనుంది.