మెక్సికోలో విషాదం... అమ్మాయి పుట్టిందని విమానం ద్వారా తెలిపే ప్రయత్నంలో ఇద్దరి మృతి

పాశ్చాత్య దేశాల్లో అమ్మాయి పుట్టిందన్న దానికి సంకేతంగా గులాబీ రంగును ప్రదర్శిస్తుంటారు. ప్రత్యేకంగా 'జెండర్ రివీల్' పార్టీలు ఏర్పాటు చేసి బంధుమిత్రులతో తమ సంతోషాన్ని పంచుకుంటారు. అయితే మెక్సికోలోని కాంకన్ నగరంలో ఓ దంపతులు తమకు అమ్మాయి పుట్టిందన్న విషయాన్ని ఓ చిన్న విమానం ద్వారా తెలిపే ప్రయత్నం చేశారు. అందుకోసం విమానాన్ని అద్దెకు తీసుకున్నారు.

ఆ విమానం గాల్లోకి లేచి పాప పుట్టింది అనే సంకేతాన్ని ఇస్తూ గులాబీ రంగు పొగను విడుదల చేసింది. కింద ఓ బోటులో ఉన్న ఆ దంపతుల బంధుమిత్రులందరూ అది చూసి కేరింతలు కొట్టారు. కానీ అంతలోనే  విమానం నీటిలో కుప్పకూలిపోయింది. ఈ ఘటనలో విమాన పైలెట్, కోపైలెట్ ఇద్దరూ మరణించారు. బోటులో ఉన్న వారు ఈ ఘటనను తమ కెమెరాల్లో బంధించగా, ఈ వీడియో సామాజిక మాధ్యమాల్లో వైరల్ అవుతోంది.