విపరీతంగా కురుస్తున్న మంచు.. 'కార్తికేయ-2' షూటింగ్ నిలుపుదల!

దాదాపు ఏడుసంవత్సరాల క్రితం నిఖిల్, అనుపమా పరమేశ్వరన్ హీరో, హీరోయిన్లుగా వచ్చిన సూపర్ హిట్ చిత్రం 'కార్తికేయ'కు సీక్వెల్ గా నిర్మితమవుతున్న రెండో భాగం షూటింగ్ కు భారీ మంచు వర్షం ఆటంకాన్ని కలిగించింది. ప్రస్తుతం ఈ సినిమా షూటింగ్ హిమాచల్ ప్రదేశ్ లోని చైనా సరిహద్దులకు సమీపంలో ఉన్న సిస్సులో జరుగుతుండగా, అక్కడ దట్టమైన మంచు కురుస్తోంది. దీంతో చిత్ర బృందం షూటింగ్ ను నిలిపివేయాల్సి వచ్చింది.

ఈ విషయాన్ని వెల్లడించిన నిఖిల్, పరిస్థితులు అనుకూలంగా లేకపోవడంతో ప్రస్తుతానికి షూటింగ్ నిలిపివేస్తున్నామని అన్నాడు. ఇదే లొకేషన్ లో పరిస్థితులు అనుకూలించిన తరువాత ఓ యాక్షన్ సీక్వెన్స్ ను చిత్రీకరించనున్నామని తెలిపాడు. కాగా, ఈ సినిమా చందూ మొండేటి దర్శకత్వంలో తెరకెక్కుతుండగా, టీజీ విశ్వప్రసాద్, అభిషేక్ అగర్వాల్ నిర్మిస్తున్న సంగతి తెలిసిందే.