Corona Vaccine: చిన్నారులకు అందించే కరోనా వ్యాక్సిన్ వచ్చే అక్టోబరు నాటికి సిద్ధం: సీరమ్

ప్రమాదకర కరోనా వైరస్ ను పారదోలే వ్యాక్సిన్ ప్రస్తుతం అనేక దేశాల్లో ప్రజలకు అందుబాటులోకి వచ్చింది. భారత్ లోని సీరమ్ ఇన్ స్టిట్యూట్ ఆఫ్ ఇండియా ఆక్స్ ఫర్డ్-ఆస్ట్రాజెనెకా వ్యాక్సిన్ కొవిషీల్డ్ ను తయారుచేస్తోంది.

 కాగా, సీరమ్ సంస్థ అనుబంధ విభాగం గ్రూప్ ఎగ్జిమ్ డైరెక్టర్ పీసీ నంబియార్ మాట్లాడుతూ, వచ్చే అక్టోబరు నాటికి చిన్నపిల్లలకు వేసే కరోనా వ్యాక్సిన్ ను అందుబాటులోకి తెస్తామని వెల్లడించారు. ఈ వ్యాక్సిన్ తొలి డోసును చిన్నారులు పుట్టిన తొలి నెలలోనే ఇవ్వాల్సి ఉంటుందని నంబియార్ తెలిపారు.

కాగా, భవిష్యత్తులో చిన్నారులకు కరోనా సోకితే ఈ వ్యాక్సిన్ నే చికిత్సలో ఉపయోగించే ఔషధంగా అభివృద్ధి చేస్తామని వివరించారు. ఇదే కాకుండా, సీరమ్ ఇన్ స్టిట్యూట్ ఆఫ్ ఇండియా అనేక కరోనా వ్యాక్సిన్లను ఉత్పత్తి చేస్తుందని, అవన్నీ ఈ ఏడాది చివరినాటికి అందుబాటులోకి వస్తాయని పేర్కొన్నారు.