రేపు గవర్నర్ ను కలవనున్న జనసేన, బీజేపీ నేతలు

పంచాయతీ ఎన్నికల నేపథ్యంలో జనసేన, బీజేపీ నేతలు రేపు ఉదయం రాజ్ భవన్ కు వెళ్లాలని నిర్ణయించుకున్నారు. ఉదయం 11.30 గంటలకు గవర్నర్ బిశ్వభూషణ్ హరిచందన్ తో భేటీ కానున్నారు. స్థానిక ఎన్నికల అంశంలో ఏపీ ప్రభుత్వ వ్యవహార శైలిపై జనసేన, బీజేపీ బృందం గవర్నర్ కు ఫిర్యాదు చేయనుంది. జనసేన నుంచి నాదెండ్ల మనోహర్, బీజేపీ తరఫున సోము వీర్రాజు ఈ ప్రతినిధి బృందానికి నేతృత్వం వహిస్తారు. రాష్ట్రంలో పంచాయతీ ఎన్నికల ప్రక్రియ నిష్పాక్షికంగా, పారదర్శకంగా నిర్వహించేలా చూడాలని, ఆ మేరకు ప్రభుత్వానికి ఆదేశాలు ఇవ్వాలని కోరనున్నారు. అంతేకాదు, ఆన్ లైన్ లో నామినేషన్లు స్వీకరించేలా ఎస్ఈసీకి ఆదేశాలు ఇవ్వాలని విజ్ఞప్తి చేయనున్నారు.