బాలీవుడ్ సినిమాలో అక్కినేని నాగ చైతన్య?

తెలుగులో ఒకదాని తర్వాత ఒకటిగా సినిమాలు చేస్తూ.. తన కెరీర్ ని బిజీగా కొనసాగిస్తున్న అక్కినేని నాగార్జున నటవారసుడు నాగ చైతన్య బాలీవుడ్ ఎంట్రీ ఇస్తున్నట్టు ఒక్కసారిగా వార్తలు గుప్పుమంటున్నాయి. త్వరలో చైతు ఓ హిందీ సినిమాలో నటించనున్నాడంటూ ప్రచారం ఊపందుకుంది. పైగా అతను నటించే హిందీ సినిమా మామూలు సినిమా కూడా కాదు.. టాప్ స్టార్ ఆమిర్ ఖాన్ నటించే సినిమా!  

అద్వైత్ చందన్ దర్శకత్వంలో ఆమిర్ ఖాన్ హీరోగా 'లాల్ సింగ్ చద్దా' పేరిట ఓ భారీ చిత్రం రూపొందుతోంది. 1994లో హాలీవుడ్ లో వచ్చిన ఆస్కార్ అవార్డు చిత్రం 'ఫారెస్ట్ గంప్'కి రీమేక్ గా దీనిని నిర్మిస్తున్నారు. ఇప్పుడీ చిత్రంలో ఓ కీలక పాత్రకు గాను నాగ చైతన్యను ఆ సినిమా యూనిట్ సంప్రదించిందనీ, చైతు దీనికి ఓకే చెప్పేశాడనీ అంటున్నారు.

ఇక, ఇందులో కథానాయికగా కరీనా కపూర్ నటిస్తోంది. ఆమె పాత్ర చిత్రీకరణ కూడా ఇప్పటికే పూర్తయింది. మరోపక్క, ఇందులో ఓ కీలక పాత్రకు ఎంపికైన తమిళ నటుడు విజయ్ సేతుపతి ఈ చిత్రం నుంచి బయటకు వచ్చేసినట్టు ఇటీవల వార్తలొచ్చాయి. డేట్స్ సమస్య వల్ల అతను చేయడం లేదని అంటున్నప్పటికీ, ఆమిర్ తో అభిప్రాయ భేదాల కారణంగానే ప్రాజక్టు నుంచి తప్పుకున్నాడనే ప్రచారం కూడా జరుగుతోంది.