Swamiji: కర్ణాటకలో స్వామీజీ కిడ్నాప్

స్వామీజీని కిడ్నాప్ చేసిన ఘటన కర్ణాటకలో కలకలం రేపుతోంది. బార్లీ జిల్లా కపిలాపూర్ లో అమ్మాజీ అనే స్వామీజీని దుండగులు కిడ్నాప్ చేశారు. అయితే వారి చెర నుంచి ఆయన బయటపడ్డారు. ఈ ఘటనపై ఆయన మాట్లాడుతూ, భాస్కర్ రెడ్డి, సతీశ్ అనే వ్యక్తులు విమానంలో షిర్డీ వెళ్దామని నమ్మించి తనను కిడ్నాప్ చేశారని చెప్పారు.

హైదరాబాదుకు తీసుకొచ్చి శంషాబాద్ మీదుగా బెంగళూరుకు తీసుకెళ్లారని తెలిపారు. అక్కడ తనను ఓ గదిలో బంధించి, డబ్బులు డిమాండ్ చేశారని చెప్పారు. నాలుగు రోజుల పాటు చిత్ర హింసలు పెట్టారని తెలిపారు. రూ. 5 కోట్లు ఇస్తానని తాను ఒప్పుకోవడంతో మళ్లీ హైదరాబాదుకు తీసుకొచ్చారని చెప్పారు.

వారి నుంచి తప్పించుకున్న తాను హైదరాబాద్ లంగర్ హౌస్ పోలీసులకు ఫిర్యాదు చేశానని స్వామీజీ తెలిపారు. దుండగులను అదుపులోకి తీసుకున్న పోలీసులు... కేసులు పెట్టకుండానే వారిని వదిలేశారని విమర్శించారు. మరోవైపు ఈ ఘటనపై లంగర్ హౌస్ సీఐ మాట్లాడుతూ, కిడ్నాప్ పై ఫిర్యాదు చేసేందుకు స్వామీజీ ముందుకు రాలేదని... తనను కిడ్నాప్ చేసినవారు తన భక్తులేనని, వారిని వదిలేయాలని స్వామీజీ కోరారని తెలిపారు.