Lottery: దుబాయ్ లాటరీలో తెలంగాణ ఐటీ ఇంజినీర్ కు బంపర్ ప్రైజ్!

గల్ఫ్ దేశాల్లో విమానం దిగీ దిగగానే ఎయిర్ పోర్టులో లాటరీ టికెట్లు ఊరిస్తుంటాయి. వాటి రేటు ఎక్కువే అయినా లాటరీల పిచ్చి ఉన్నవాళ్లు తప్పక కొంటుంటారు. సరిగ్గా చెప్పాలంటే భారతీయులే ఈ లాటరీలను ఎక్కువగా కొనుగోలు చేస్తుంటారు. అంతేకాదు మనవాళ్లు ప్రైజులు కూడా భారీగానే అందుకున్నారు. తాజాగా తెలంగాణకు చెందిన ఓ సాఫ్ట్ వేర్ ఇంజినీరు ఏకంగా రూ.7.3 కోట్లు కొల్లగొట్టాడు. లక్కీడ్రాలో మనవాడు కొనుగోలు చేసిన లాటరీ నెంబరుకే ఫస్ట్ ప్రైజ్ వచ్చింది.

లాటరీ కొట్టిన ఆ వ్యక్తి పేరు గ్రంథి వెంకట లక్ష్మీతాతారావు. 37 ఏళ్ల తాతారావు దుబాయ్ లోని ఓ ఐటీ సంస్థలో ఏడాదిగా సాఫ్ట్ వేర్ ఇంజినీర్ గా పనిచేస్తున్నాడు. ఇటీవలే మిలీనియం మిలియనీర్ ప్రమోషన్ లాటరీ టికెట్ కొనుగోలు చేశాడు. తనకే మొదటి బహుమతి రావడంతో తాతారావు ఆనందంతో ఉబ్బితబ్బిబ్బవుతున్నాడు. ఈ లాటరీ మొత్తంతో భారత్ లో ఉన్న తన కుటుంబం పరిస్థితి మారిపోతుందని ఆనందంగా చెప్పాడు.

కాగా, యూఏఈలో 1999లో మిలినీయం మిలియనర్ ప్రమోషన్ లాటరీ ప్రారంభం కాగా, తాతారావు సహా 168 మంది భారతీయులు ఈ లాటరీ గెలుచుకోవడం విశేషం అని చెప్పాలి.