Rhea Chakravarthy: సుశాంత్ మృతదేహం వద్ద 'సారీ' చెప్పిన కారణమిదే: రియా

సుశాంత్ మరణించిన తరువాత తాను ఎంతో బాధపడ్డానని, అతని అంత్యక్రియలకు హాజరయ్యే వారి జాబితాలో తన పేరును చేర్చని కారణంగానే వెళ్లలేకపోయానని సుశాంత్ ప్రియురాలు, అతని ఆత్మహత్యకు ప్రేరేపించిందని ఆరోపణలు ఎదుర్కొంటున్న రియా చక్రవర్తి వ్యాఖ్యానించారు. తాజాగా ఓ ఆంగ్ల మీడియాతో మాట్లాడిన ఆమె, సుశాంత్ ను కడసారి చూసేందుకు మార్చురీ వద్దకు వెళ్లానని, అక్కడ కూడా చాలా సేపు నన్ను లోనికి అనుమతించలేదని, డెడ్ బాడీని వ్యాన్ ఎక్కిస్తుంటే కేవలం మూడు నాలుగు సెకన్లు మాత్రమే చూశానని చెప్పారు.

ఆ సమయంలో 'సారీ బాబూ' అని రియా వ్యాఖ్యానించినట్టు వచ్చిన వార్తలపై స్పందిస్తూ, జీవితాన్ని కోల్పోయి, మరణించిన ఓ వ్యక్తిని క్షమించమని కోరడం మినహా తాను ఇంకేం చేయగలనని ప్రశ్నించారు. గౌరవంతో అతని పాదాలను తాకానని, భారతీయుడు ఎవరైనా దీన్ని అర్థం చేసుకుంటారని అన్నారు. సుశాంత్ కుటుంబీకులకు తానంటే ఇష్టం లేదని చెప్పారు.