బన్నీతో కొరటాల శివ... అదిరిపోయే కాంబినేషన్ ఖరారు!

అల్లు అర్జున్, కొరటాల శివ కాంబినేషన్ గురించి చాన్నాళ్లుగా వినిపిస్తూనే ఉన్నా, ఇన్నాళ్లకు అఫిషియల్ ప్రకటన వచ్చింది. అల్లు అర్జున్ 21వ చిత్రం కొరటాల శివ దర్శకత్వంలో తెరకెక్కనుంది. గీతాఆర్ట్స్-2, యువసుధ ఆర్ట్స్ ఈ చిత్రాన్ని సంయుక్తంగా నిర్మిస్తున్నాయి.

సామాజిక అంశాలను సినిమా ఇతివృత్తాలుగా మలిచి ప్రేక్షకులను ఆకట్టుకునే కొరటాల ఇప్పుడు బన్నీని ఎలా చూపిస్తాడన్నది అత్యంత ఆసక్తికరంగా మారింది. ఈ సినిమా గురించి గీతాఆర్ట్స్-2 ట్విట్టర్ లో స్పందించింది. అందరూ ఎంతో ఆసక్తిగా ఎదురుచూస్తున్న కాంబినేషన్ ఖరారు అయిందని, స్టయిలిష్ స్టార్ అల్లు అర్జున్, ఏస్ డైరెక్టర్ కొరటాల శివ ఓ బిగ్గెస్ట్ ఎంటర్టయినర్ కోసం కలిసి పనిచేస్తున్నారని వెల్లడించింది. ఈ చిత్రాన్ని పలు భాషల్లో తెరకెక్కిస్తున్నట్టు వెల్లడించింది.

టాలీవుడ్ అగ్రహీరో అల్లు అర్జున్ తన 21వ చిత్రం ప్రకటనపై స్పందించారు. ఈ సినిమా ప్రకటిస్తుండడం పట్ల చాలా సంతోషంగా ఉందని, కొరటాల శివతో చిత్రం చేయనుండడం ఎంతో ఉద్విగ్నత కలిగిస్తోందని పేర్కొన్నారు. కొంతకాలం నుంచి ఈ సినిమా ఎప్పుడు ఫైనలైజ్ అవుతుందా అని ఎదురుచూశానని వెల్లడించారు. నిర్మాతగా తొలి సినిమా తీస్తున్న మిక్కిలినేని సుధాకర్ కు శుభాకాంక్షలు అంటూ బన్నీ ట్వీట్ చేశారు.

ఈ చిత్రం నిర్మాణంలో పాలుపంచుకుంటున్న ఇతరులను ఉద్దేశించి వ్యాఖ్యానిస్తూ...  "శాండీ, స్వాతి, నట్టి... మీపై నేను ప్రేమను చూపించే విధానం ఇలా ఉంటుంది" అంటూ బన్నీ పేర్కొన్నారు. మిక్కిలినేని సుధాకర్ ఈ చిత్రంతో నిర్మాతగా తన అదృష్టాన్ని పరీక్షించుకోనున్నారు. శాండీ, నట్టి, స్వాతి సహనిర్మాతలుగా వ్యవహరిస్తున్నారు. కాగా, బన్నీ ప్రస్తుతం సుకుమార్ దర్శకత్వంలో 'పుష్ప' చిత్రం చేస్తున్నారు. 'పుష్ప' చిత్రీకరణ పూర్తయిన వెంటనే కొరటాల శివతో చిత్రం సెట్స్ పైకి వెళ్లనుంది.