Balineni Srinivasa Reddy: పల్టీలు కొట్టిన ఏపీ మంత్రి బాలినేని ఎస్కార్ట్ వాహనం.. ఒకరి మృతి
- మరో ముగ్గురికి తీవ్రగాయాలు
- హైదరాబాద్ శివారులోని అంబర్ పేట్ వద్ద ప్రమాదం
- గచ్చిబౌలి నుంచి విజయవాడకి వెళ్తుండగా ఘటన
ఏపీ మంత్రి బాలినేని శ్రీనివాస రెడ్డి ఎస్కార్ట్ వాహనం బొలేరో టైర్ పగిలిపోవడంతో ఘోర రోడ్డు ప్రమాదం జరిగింది. దీంతో వాహనంలో ఉన్న పాపయ్య అనే హెడ్ కానిస్టేబుల్ ప్రాణాలు కోల్పోయాడు. ఈ ఘటనలో మరో ముగ్గురికి తీవ్రగాయాలయ్యాయి. హైదరాబాద్ శివారులోని అబ్దుల్లా పూర్ మెట్ పోలీసు స్టేషన్ పరిధిలోని పెద్ద అంబర్ పేట్ ఔటర్‌ రింగ్ రోడ్డు మీదుగా బాలినేని ఎస్కార్ట్ వాహనం వెళుతోన్న సమయంలో ఈ ప్రమాదం జరిగింది.
గాయాలపాలయిన వారిని పోలీసులు హయత్ నగర్ లోని ఓ ఆసుపత్రికి తరలించి, చికిత్స అందిస్తున్నారు. హైదరాబాద్‌లోని గచ్చిబౌలి నుంచి వారు విజయవాడకి వెళ్తున్న సమయంలో ఈ ప్రమాదం జరిగింది. ఈ ప్రమాదంపై పోలీసులు కేసు నమోదు చేసుకొని దర్యాప్తు ప్రారంభించారు. ఈ ప్రమాదంపై పూర్తి సమాచారం అందాల్సి ఉంది.
