Upasana: చెంచుల ఆహారపు అలవాట్లపై ఉపాసన వ్యాఖ్యలు

టాలీవుడ్ అగ్రహీరో రామ్ చరణ్ అర్ధాంగి ఉపాసన కొన్నిరోజుల కిందట శ్రీశైలం పరిసరాల్లోని గిరిజనులకు నెలరోజులకు సరిపడా నిత్యావసరాలు పంపిణీ చేశారు. ఈ సందర్భంగా ఆమె తన బృందంతో నల్లమల అటవీప్రాంతాల్లోని చెంచు గూడేలను సందర్శించారు. అక్కడి ప్రజల సంస్కృతి, వారి జీవన విధానాన్ని ఆమె ఎంతో ఆసక్తికగా పరిశీలించారు. తాజాగా ఆ పర్యటనకు సంబంధించిన ఫొటోలను ఉపాసన సోషల్ మీడియాలో పంచుకున్నారు. వాటిలో రెండు మేక పిల్లలను ఎత్తుకుని ఉన్న ఫొటోలు ఉన్నాయి.

ఈ పోస్టులో ఆమె వ్యాఖ్యానిస్తూ... ఈ బుజ్జి మేకలు కొన్నాళ్ల తర్వాత చెంచు గిరిజనులకు రుచికరమైన ఆహారంగా  మారిపోతాయేమో అంటూ స్పందించారు. "ప్రజల ఆహారపు అలవాట్లను, వారి సంస్కృతిని అర్థం చేసుకోవడం, గౌరవించడం నేర్చుకుంటున్నాను. ఈ చెంచులు నిజంగా అద్భుతమైన ప్రజలు. ప్రకృతి మాత పట్ల వారి ప్రేమ నిరుపమానం.

అయితే, మన నమ్మకాలు, అభిప్రాయాలను ఇతరులపై రుద్దడానికి ఇది తగిన సమయం కాదు. మాంసం తినండి.. కానీ మితంగా! మనకు ఈ వనరులు ఎక్కడ్నించి వస్తున్నాయో తెలుసుకుని మసలుకుందాం. అందుకే ఎంపిక చేసుకున్న ఆహారం తీసుకుందాం... మన భూమండలానికి, మనకు అవసరమైనంత మేర, నైతికతతో కూడిన ఆహారపు అలవాట్లకు సంబంధించి సందేశాన్ని వ్యాప్తి చేద్దాం" అంటూ ఉపాసన ఫేస్ బుక్ లో పోస్ట్ చేశారు.