Revanth Reddy: బిడ్డకు 'ఉద్యోగం' కల్పించడంలో ఉన్న ఆతృత... మా 'తెలంగాణ ఆడబిడ్డ'పై లేదా?: రేవంత్ రెడ్డి

ఎంతో కష్టపడి చదివి, ఉద్యోగాలు తెచ్చుకుని కూడా, పోస్టింగ్ లు రాని వారు తెలంగాణలో ఎందరో ఉన్నారని ఆరోపిస్తూ, "నిజాలు..నియామకాలు...!" అంటూ కాంగ్రెస్ వర్కింగ్ ప్రెసిడెంట్ రేవంత్ రెడ్డి తన ట్విట్టర్ ఖాతాలో ఓ పోస్టును పెట్టగా, అదిప్పుడు వైరల్ అవుతోంది. డిప్యూటీ తహసీల్దారుగా ఎంపికైన కరీంనగర్ జిల్లా జమ్మికుంట మండలానికి చెందిన అరుణ, ఇప్పటికీ పోస్టింగ్ రాక, ఇల్లు గడవడం కోసం వ్యవసాయ పనులకు వెళుతుండగా, ఓ దినపత్రిక ఈ విషయమై ప్రత్యేక కథనాన్ని ప్రచురించింది.

ఎంపికై ఏడు నెలలు గడుస్తున్నా, ఇంకా తనకు పోస్టింగ్ ఇవ్వలేదని, గ్రూప్-2 ఉద్యోగం కోసం తాను ఎంతో శ్రమించానని అరుణ వాపోగా, ఆ కథనాన్ని ట్వీట్ చేస్తూ, "బిడ్డకు” ఉద్యోగం” కల్పించడంలో  ఉన్న  ఆతృత...మా “తెలంగాణ ఆడబిడ్డ” పై  లేదా...!! " అంటూ తెలంగాణ సీఎంఓను ట్యాగ్ చేస్తూ రేవంత్ రెడ్డి ప్రశ్నించారు.