Balakrishna: పూరి దర్శకత్వంలో బాలయ్య సినిమా.. స్క్రిప్టు రెడీ!

ప్రస్తుతం విజయ్ దేవరకొండతో తెలుగు, హిందీ భాషల్లో యాక్షన్ ఓరియెంటెడ్ చిత్రాన్ని రూపొందిస్తున్న ప్రముఖ దర్శకుడు పూరి జగన్నాథ్ తన తదుపరి చిత్రానికి కూడా స్క్రిప్టును అప్పుడే సిద్ధం చేసుకున్నాడు. ఈ చిత్రాన్ని నందమూరి బాలకృష్ణతో పూరి చేయనున్నట్టు తెలుస్తోంది. బాలకృష్ణకు కథను చెప్పడం, ఆయన ఓకే చేసేయడం జరిగిపోయాయని అంటున్నారు. ఈ ప్రాజక్టుకు సంబంధించి పూర్తి స్క్రిప్టును కూడా పూరి అప్పుడే సిద్ధం చేసినట్టు సమాచారం. 'పైసా వసూల్' చిత్రం తర్వాత బాలకృష్ణ, పూరి కాంబోలో వస్తున్న సినిమా ఇది.  

ఇక, ప్రస్తుతం బాలకృష్ణ బోయపాటి శ్రీను దర్శకత్వంలో ఓ చిత్రం చేస్తున్నారు. లాక్ డౌన్ కారణంగా ఈ చిత్రం షూటింగు ఆగింది. త్వరలోనే షూటింగులు పునః ప్రారంభం కాగానే, బోయపాటి కూడా ఈ సినిమా షూటింగును మొదలెడతారు. ఆ చిత్రం తర్వాత ప్రముఖ దర్శకుడు బి.గోపాల్ దర్శకత్వంలో బాలయ్య ఓ సినిమా చేస్తారంటూ నిన్నటి వరకు వార్తలొచ్చాయి. అయితే, తాజా సమాచారం ప్రకారం, ఆ ప్రాజక్టు కేన్సిల్ అయిందట. ఆ స్థానంలోనే పూరి జగన్నాథ్ తో చేసే సినిమా ఉంటుందని అంటున్నారు. పూర్తి వివరాలు త్వరలో వెల్లడవుతాయి.