Nitin Gadkari: దేశవ్యాప్తంగా రెండుమూడేళ్లలో రహదారుల విస్తరణ ఊపందుకుంటుందన్న గడ్కరీ

రాష్ట్రాలు, కేంద్ర పాలిత ప్రాంతాల రవాణా శాఖ మంత్రులతో కేంద్ర రవాణా శాఖ మంత్రి నితిన్ గడ్కరీ వీడియో కాన్ఫరెన్స్ నిర్వహించారు. ఈ సందర్భంగా ఆయన, అంతర్రాష్ట్ర రవాణాపై ఆయా ప్రభుత్వాలు చర్యలు తీసుకోవాలని, తద్వారా నిత్యావసరాల రవాణాకు అడ్డంకులు తొలగించాలని సూచించారు.

ఈ సందర్భంగా ఆయన చెబుతూ, దేశంలో జాతీయ రహదారులు, సాధారణ రహదారుల మౌలిక సదుపాయాల కల్పనకు, జాతీయ రహదారుల విస్తరణకు కేంద్రం అత్యున్నత ప్రాధాన్యత ఇస్తోందని అన్నారు. వచ్చే రెండేళ్లలో రహదారుల విస్తరణ మరింత భారీగా ఉండనుందని, విస్తరణ పనులు 2 నుంచి 3 రెట్లు అధిక వేగం సంతరించుకుంటాయని భావిస్తున్నట్టు తెలిపారు.

రహదారుల విస్తరణ సమయంలో భూసేకరణకు ఆయా రాష్ట్రాల్లో సమస్యలు ఏర్పడుతున్నాయని, ఈ విధమైన అడ్డంకులు జాతీయ రహదారుల అభివృద్ధి పనుల్లో జాప్యానికి కారణమవుతున్నాయని వివరించారు. రాష్ట్రాలు, కేంద్ర పాలిత ప్రాంతాలు ఈ అంశంపై దృష్టి సారించాలని కోరారు. అంతేగాకుండా, ఇప్పటివరకు రాష్ట్రాలు వినియోగించకుండా ఉన్న రూ.25,000 కోట్ల మేర నిధులను ఖర్చు చేయాలని సూచించారు.