Saudi: అత్యంత పాశవికమైన కొరడా దెబ్బల శిక్ష రద్దు: సౌదీ అరేబియా
- నేరస్థుల పట్ల కర్కశంగా వ్యవహరించే సౌదీ
- రాజు ఆదేశాల ప్రకారం కొరడా శిక్ష రద్దు
- వెల్లడించిన సుప్రీంకోర్టు జనరల్ కమిషన్
నేరస్థుల పట్ల అత్యంత పాశవికమైన శిక్షలను అమలు చేసే సౌదీ అరేబియా, ఓ కీలక నిర్ణయం తీసుకుంది. ఎంతో మంది విమర్శించే కొరడా దెబ్బల శిక్షను రద్దు చేస్తున్నట్టు ప్రకటించింది. గతంలో కొరడా దెబ్బలు విధించే శిక్షలకు పాల్పడిన వారికి ఇకపై జైలుశిక్ష లేదా జరిమానా లేదా రెండూ విధించాలని నిర్ణయించింది.
ఈ మేరకు సుప్రీంకోర్టు జనరల్ కమిషన్ ఓ ప్రకటన విడుదల చేసింది. సౌదీ రాజు సల్మాన్, యువరాజు మహ్మద్ బిల్ సల్మాన్ ఆదేశాల మేరకు ఈ శిక్షను రద్దు చేస్తున్నట్టు వెల్లడించింది. కాగా, ప్రభుత్వ నిర్ణయాన్ని మానవ హక్కుల సంఘాలు స్వాగతించాయి. మతానికి వ్యతిరేకంగా ప్రచారం చేయడం, అక్రమ సంబంధాలు పెట్టుకోవడం, రహదారులపై రొమాన్స్ చేయడం వంటి నేరాలకు ఇక్కడ బహిరంగ కొరడా దెబ్బల శిక్షలను విధిస్తుంటారు.
