భారత్ కు శత్రుభీకర మిస్సైళ్లు, టార్పెడోలు విక్రయించేందుకు అమెరికా ఆమోదం

Tue, Apr 14, 2020, 03:27 PM
US approves to give Harpoon missiles and MK torpedos
  • అమెరికాకు హైడ్రాక్సీ క్లోరోక్విన్  మాత్రలను పంపిన భారత్
  • కృతజ్ఞతగా రక్షణ ఒప్పందాన్ని పట్టాలెక్కించిన అమెరికా!
  • భారత్ కు ఆయుధాలు ఇస్తున్నామని చట్టసభలకు వెల్లడి
కరోనా రక్కసి కరాళ నృత్యం చేస్తున్న తరుణంలో 35 లక్షల హైడ్రాక్సీ క్లోరోక్విన్ మాత్రలను పంపిన భారత్ పట్ల అమెరికా కృతజ్ఞత ప్రదర్శిస్తోంది. ప్రత్యర్థి రక్షణ వ్యవస్థలను తుత్తునియలు చేసే హర్పూన్ బ్లాక్-2 ఎయిర్ లాంచ్డ్ క్షిపణులతో పాటు ఎంకే-54 టార్పెడోలను విక్రయించేందుకు అంగీకారం తెలిపింది.

ఈ వ్యాపార ఒప్పందం విలువ 155 మిలియన్ డాలర్లు ఉంటుందని అంచనా. 10 ఏజీఎం-84ఎల్ హర్పూన్ బ్లాక్-2 మిసైళ్ల విలువ 92 మిలియన్ డాలర్లు కాగా, 16 ఎంకే-54 ఆల్ రౌండప్ లైట్ వెయిట్ టార్పెడోలు, 3 ఎంకే-54 ఎక్సర్ సైజ్ టార్పెడోల విలువ 63 మిలియన్ డాలర్లు ఉంటుందని అమెరికా రక్షణ శాఖ తమ జాతీయ చట్టసభలకు వెల్లడించింది.

ఇటీవలే ఈ రెండు ఆయుధాలను అందించాలని భారత ప్రభుత్వం విజ్ఞప్తి చేయగా, అమెరికా రక్షణ శాఖ ఆ ప్రతిపాదనను పరిశీలనలో ఉంచింది. అమెరికాలో కరోనా అత్యంత తీవ్రస్థాయిలో విజృంభిస్తుండడంతో వాణిజ్య ఆంక్షలు సడలించి మరీ భారత్ పెద్దఎత్తున హైడ్రాక్సీ క్లోరోక్విన్ మాత్రలను ఎగుమతి చేసింది. ఈ నేపథ్యంలో, భారత్ చేసిన సాయాన్ని దృష్టిలో ఉంచుకున్న అమెరికా అధినాయకత్వం ఆగమేఘాలపై రక్షణ ఒప్పందాన్ని పట్టాలెక్కించినట్టు తెలుస్తోంది.

భారత్ కోరిన ఆయుధాల విషయానికొస్తే.... హర్పూన్ మిసైళ్లను నావికాదళానికి చెందిన పి-81 విమానానికి అమర్చుతారు. ఇవి నావికా దళ సామర్థ్యాన్ని మరింత ఇనుమడింప చేస్తాయి. ఇక, ఎంకే-54 టార్పెడోల విషయానికొస్తే ఇవి జలాంతర్గాములను వెతికి మరీ వేటాడతాయి. ఇవి తక్కువ బరువు ఉండడంతో అత్యంత వేగంతో ప్రయాణించి కొద్ది సమయంలోనే లక్ష్యాన్ని తాకుతాయి.
X

Feedback Form

I agree to Terms of Service & Privacy Policy
Do you hate Fake News, Misleading Titles, Cooked up Stories and Cheap Analyses?...
We are here for YOU: Team ap7am.com
GarudaVega Banner Ad
Aha
Latest Video News..
Advertisement