IndiGo: దేశంలో తొలిసారి విమానయాన సిబ్బంది కరోనాతో మృతి

తమ సిబ్బందిలో ఒకరు కరోనా వైరస్‌ సోకి చెన్నైలో ప్రాణాలు కోల్పోయారని భారత విమానయాన సంస్థ ఇండిగో తెలిపింది. అయితే, ఈ విషయంపై ఆ సంస్థ ఎటువంటి వివరాలు వెల్లడించలేదు. అయితే, మీడియాకు తెలిసిన వివరాల ప్రకారం.. ప్రాణాలు కోల్పోయిన ఆ వ్యక్తి విమాన నిర్వహణ ఇంజనీరుగా పనిచేస్తున్నాడు. శుక్రవారం అతడు ప్రాణాలు కోల్పోయాడు.

అతడికి దాదాపు 50 ఏళ్లు ఉంటాయి. ఆ విమానయాన సంస్థలో అతడు 2006 నుంచి పనిచేస్తున్నాడు. ఉద్యోగం నిమిత్తం చెన్నైలోనే ఉంటున్నాడు. 'మా విమానయాన సంస్థలో పనిచేస్తోన్న ఓ వ్యక్తి చెన్నైలో కొవిడ్‌-19తో మృతి చెందినందుకు విచారం వ్యక్తం చేస్తున్నాం' అని ఇండిగో ప్రతినిధి ఒకరు మీడియాకు తెలిపారు.  

విమానయన సంస్థకు చెందిన వ్యక్తి కరోనాతో మృతి చెందడం దేశంలో ఇదే మొదటిసారి. 'ఇండిగో సిబ్బంది అందరికీ ఇది చాలా బాధ కలిగించే విషయం. ఈ బాధాకర సమయంలో ఆయన కుటుంబానికి అండగా నిలబడతాం. ఆయన కుటుంబం వివరాలు తెలపకుండా గోప్యతను పాటిస్తాం' అని ఇండిగో ప్రతినిధి ఒకరు తెలిపారు. కాగా, దేశంలో కరోనా బాధితుల సంఖ్య 8,356కు చేరింది. మృతుల సంఖ్య 273కి పెరిగింది.