Vijay Devarakonda: విజయ్ దేవరకొండపై బాలీవుడ్​ నటి పొగడ్తల వర్షం

అర్జున్ రెడ్డితో ఓవర్‌‌నైట్ స్టార్‌‌డమ్ తెచ్చుకున్న విజయ్ దేవరకొండ బాలీవుడ్‌లో ఎంట్రీ ఇచ్చేందుకు రెడీ అవుతున్నాడు. పూరీ జగన్నాథ్ దర్శకత్వంలో తెరకెక్కుతున్న ‘ఫైటర్’ చిత్రం తెలుగు, హిందీతో పాటు పలు భాషల్లో విడుదల కానుంది.

ఈ సినిమాలో విజయ్ సరసన బాలీవుడ్ యంగ్ బ్యూటీ అనన్య పాండే నటిస్తోంది. ఇటీవలే విజయ్, అనన్య వర్కింగ్ స్టిల్ట్స్‌ను చిత్ర యూనిట్ విడుదల చేసింది. కరణ్ జొహార్ నిర్మిస్తున్న ఈ పాన్ ఇండియా సినిమాలో నటిస్తున్నందుకు ఆనందం వ్యక్తం చేసిన అనన్య...తాజాగా హీరో విజయ్ దేవరకొండపై పొగడ్తల వర్షం కురిపించింది. విజయ్ చాలా మంచి వ్యక్తి అని, స్మార్ట్ అని అభిప్రాయపడింది.

ఇక, అర్జున్‌ రెడ్డిలో విజయ్ క్యారెక్టరైజేషన్ దృష్యా ఆ చిత్రాన్ని ఇప్పటికీ వివాదాస్పద చిత్రంగా భావిస్తున్నారు. ఈ విషయం గురించి తాను విజయ్‌తో చర్చించలేదని అనన్య చెబుతోంది. అర్జున్ రెడ్డిలో దేవరకొండ బాగా నటించాడని కితాబిచ్చింది. అయితే, సినిమాలో అలాంటి పాత్ర పోషించినంత మాత్రాన నిజ జీవితంలోనూ మనుషులు అలాగే ఉంటారని అనుకోవడం పొరపాటు అని చెప్పింది. ఈ క్రమంలో విజయ్‌పై బాలీవుడ్ యువ నటి పొగడ్తల వర్షం కురిపించింది. ‘విజయ్ మంచి వ్యక్తి. స్మార్ట్. బాగా మాట్లాడుతాడు. ఎవరితో ఎలా మాట్లాడాలో తెలిసిన వ్యక్తి’ అని చెప్పుకొచ్చింది.