India: ఆకర్షణీయ ఫీచర్లతో హ్యుందాయ్ సరికొత్త కారు... 'ఆరా'!

దక్షిణ కొరియా కార్ల తయారీ దిగ్గజం హ్యుందాయ్ మోటార్స్ భారత్ లో మరో మోడల్ తీసుకువచ్చింది. సబ్ కాంపాక్ట్ సెగ్మెంట్ లో తీసుకువచ్చిన ఈ కారు పేరు ఆరా. ధరల శ్రేణి రూ.5.8 లక్షల నుంచి రూ.9.23 లక్షల మధ్య ఉంటుంది. సబ్ కాంపాక్ట్ విభాగంలో హ్యుందాయ్ ఆరా... మారుతి సుజుకి డిజైర్, హోండా అమేజ్ లకు గట్టిపోటీ ఇస్తుందని భావిస్తున్నారు. ఇది పెట్రోల్, డీజెల్ వెర్షన్లలో వస్తోంది. ఆరా కొన్ని అంశాల్లో గ్రాండ్ ఐ10 నియోస్ ను పోలి ఉంటుంది.

దీనికి డీఆర్ఎల్ (డే టైమ్ రన్నింగ్ లైట్లు), ట్రయాంగిల్ ఫాగ్ ల్యాంప్, జెడ్ ఆకారంలో ఎల్ఈడీ టెయిల్ ల్యాంప్స్ అమర్చారు. రెండు వైపులా 15 అంగుళాల అల్లాయ్ వీల్స్ ఉన్నాయి. డ్రైవర్ రియర్ వ్యూ మానిటర్, స్మార్ట్ ఫోన్ కనెక్టివిటితో కూడిన 8 అంగుళాల టచ్ స్క్రీన్ ఎంటర్టయిన్ మెంట్ జోన్ ఏర్పాటు చేశారు. మరింత భద్రత కోసం హ్యుందాయ్ ఆరాను 65 శాతం అడ్వాన్స్ డ్ హై స్ట్రెంగ్త్ స్టీల్ తో తయారుచేశారు. అంతేకాదు, రెడ్, పోలార్ వైట్, టైఫూన్ సిల్వర్, టైటాన్ గ్రే, ఆల్ఫా బ్లూ, వింటేజ్ బ్రౌన్ రంగుల్లో ఈ కారు లభ్యమవుతుంది.